Fast Track Court-in thiam loh chantir

Vawiin (6.8.2026) hian Kolasib Fast Track Court chuan a fanu kumtling lo nawhchizawrh tirtu thiam loh a chantir a, lung ina tang turin a hrem.

Kolasib Fast Track Court thuremnaa tarlan a nih danin, August 5, 2024 khan Kawnpui nu pakhakin Kawnpui Police Station-ah FIR a theh lut a, a sawi danin, a tunu kumtling lo chu amah hringtunu ngeiin January, 2023 leh July 2024 inkar khan pawisa leh zu duh vangin a inzawrh luihtir thin niin a sawi a ni.

Kawnpui Police chuan an chhui nghal a, he thila mawhphurtu ber nia hriat nutling kum 42, Kawnpui khua leh midang pakhat Indra Bahadur Bandhari Chhetri (80), Kawnpui Kutbul ram thlam vela che tla thin chu an man nghal.

Police-ten he thil thleng an chhui chiannaa a lan danin naupang kumtling lo nu hian pawisa leh zu a duh avangin a fanu chu hnamdang truck driver leh railway kawng hna thawktu te hnenah Rs. 500 leh zu in tur hlawh turin tum eng emaw zat a inzawrh luihtir thin tih hriat a ni.

Thubuai hi Kolasib Fast Track Court chuan rel nghalin, thuhretu mi 7 thu zawhfiah an ni. Thuhretute thusawi, doctor report, FIR thehluttu thu sawi, thubuai chhuitu police officer leh amah puibawmtute thusawi chu Kolasib Fast Track Court Judge R. Vanlalena chuan vawiin (6.8.2026) thutlukna siamin, a fanu kumtling lo inzawrhluih tirtu hi thiam loh a chantir.

BNS Section 96 hnuaiah kum 5 chhung lung in tang tura tih a ni a, BNS Section 98 hnuaiah kum 5 dang jail tang tura tih a nih bakah kum tling lo hnena zu a in luihtir thin avangin JJ Act hmangin kum 2 chhung jail tang tur tih a ni. Heng hremna hi a mal te tea chhiar tur niin a tan hun chhung tur chu kum 12 a ni.

Hei bakah hian court chuan Rs. 15,000 chawi turin a ti a, a sum chawi tur hi a pe duh lo emaw a nei lo emaw a nih chuan thla 6 dang a tan belh a ngai dawn a ni.

He thubuaia inhnamhnawiha puh Indra Bahadur Bandhari Chhetri chu February 2025 khan a thih avangin a thubuai tihtawp a ni.