Aug 07, 2026
Friday
FCRA-A CCM HMALAKNA KAN THLAWP TLAT – MNF
MNF chuan Central Sawrkarin Foreign Contribution(Regulation) Ammendment Bill 2026 puluta India rama sakhua leh tlawmngaipawl thenkhat ram dang atanga tanpuina dawn thin dan khauh zawka kalpui a tumna Council of Churches in Mizoram (CCM) in dodal a, August 11, 2026 a kawng zawh a buatsaih tur chu an thlawp tlat tih an tarlang a, “He huna tel theuh tur leh kal vek turin MNF Party mipuite kan inhriattirin kan inngen a ni. He hun buatsaih tur hi tluang taka hman a nih a, Mizoram mipuite duhdan Central Sawrkar hriata puanzarna leh lantirna hlawhtling tak a nih ngei kan duhin, kan beisei takzet a ni,” an ti.
FCRA chungchangah hian Mizoramah chuan political party tinte pawh thukhat vua a, a huhova duh lohna lantir a, dodal tlan a duh avangin All Party Meeting neih tawhah pawh rawtna an lo thlen tawh tih tarlangin MNF chuan, “Kan thu thlen tawh ang hian he bill kal mek hi tlang lo se, dodal zel nise tih hi kan thutlukna ala ni reng. Ramdang atanga sakhaw tenau zawk leh tlawmngaipawl India rama awmte chhawmdawlna leh puihna awm thin tihkhaihlakna leh heng puihna lokal thin atanga thahnemngai taka rawngbawlna tih bawrhban tumna hi kan pawm thei lo,” tiin a dodal tlat tih an tarlang.
MNF chuan Mizorama Sawrkarna chelhmektute pawh he bill hi do a, Central Sawrkar hriat a dodal a, Parliament thlenga kan MP te hmanga Mizoram mipuite duhdan lantir ngam tura an phut thu tarlangin, “India rama sakhaw tihbik nei, a lian zawkin a te zawkte nekchep a, tihthuanawp a tumna hmalakna reng reng chu sakhaw zalenna ram kan nih anga dodal zel hi kan dinna nghet tlat a nih angin, hemi kawnga CCM hmalakna hi a thlawpin, hlawhtlinna hmu ngei turin Mizo Mipuite lungrual taka thawkchhuak turin kan sawm takmeuh meuh bawk a ni,” a ti.
