News

Mizoram State Commission for Protection of Child Rights (MSCPCR) chuan naupang kaihhnawih pawikhawihna a thlenin, dan anga naupangte dikna leh chanvo pek a nih bakah an nihna humhim kawngah mipuite leh media-te fimkhur lehzual turin a ngen.

MSCPCR tarlan danin, hursualna kaihhnawiha naupangte – a tuartu emaw, a tisualtu emaw pawh nise, POCSO Act, 2012 Section 23 in a sawi angin, an hming, thlalak, veng leh khua, etc., emaw, anmahni chhui chhuah theihna tur lam zawngin thuchhuah leh thehdarh a khap tlat a ni.

Tunhnaiah kan thenawm state, Assam Cachar District-ah Mizoram mi kumtling lo pahnihte chu rukbo leh pawngsual an tawk hi pawi an ti tak zet tih tarlangin MSCPCR chuan, “Pawikhawihtute man thuai an ni hi lawmawm kan tiin, dan anga dik taka an chungthu rel fel thuai a nih theih nan Assam State Commission for Protection of Child Rights (ASCPCR) pawh hriattir an ni,” an ti.

MSCPCR chuan pawl hrang hrangten sawrkar laka lungawi lohna leh nawrh an huaihawt thinah zirlai, kumtling lo an tel tir thin chu naupangte hmakhua leh an tana tha ber (best interest) a nih loh avangin hetiang nawrh leh lungawi lohna lantirna reng rengah naupangte hmatheh tawh lo turin mipuite an chah.