News

Vawiin (6.11.2025) chhun khan kumin Krismas leh kumthar vuakveta mipuiten ralmuang leh him zawka hunpui an hman theih nan Lawngtlai District-a, puak thei thil – halpuah, halmawi leh a kaihhnawih chi hrang hrang khapna siam leh a kenkawh dan tur relin DC Conference Hall-ah Lawngtlai DC Donny Lalruatsanga hoin an thukhawm.

Donny Lalruatsanga chuan Krismas leh kumthar vuakvetah halpuah leh a kaihhnawih hal lo turin sawrkarin thuchhuah a siam thin tih sawiin, ‘Heihi mipui vangtlang him zawkna tur a nih angin, tha tak a zawm turin mipuite ka ngen a ni. Halmawi leh puak thei thil hian mihring hriselna nasa takin a nghawng thin a, a bik takin lung tha lo leh kum lama upa zawkte tan a pawi thui em em a ni,’ a ti.

Thukhawmah hian District Magistrate- atangin Halmawi leh a kaihhnawh chi hrang hrang, naupang silai lem (a mu kapchhuak thei) lakluh, hralhchhuah, kawl leh hman khapna thupek (prohibitory order) a hma lama siam a, puanzar thuai ni se, an ti. Veng tina YLA information mike kaltlanga mipui hnenah puanzar ni se tih niin, hmala turin CYLA-te ruat an ni.

MJA Lawngtlai District hnenah halpuah, halmawi leh a kaihhnawih that lohna a zau thei ang bera puangzar tura ngenna siam ni se, Lawngtlai District-a youtuber-te hnenah an channel kaltlanga puangzar tura hmalak ni bawk se, an ti. LWA leh MHIP ten an Branch theuhah hma la turin ngenna lo siam se tiin, MUP leh LUP – ten hma lo la bawk se, DIPRO-in halpuah, halmawi leh a kaihhnawih that loh zia inzirtirna video/flyers lo siam se tih a ni bawk.

Thutkhawmah hian Lawngtlai District-a sorkar official-te bakah CYLA, MUP,LUP, MHIP, LWA, VC, MJA leh Kohhran aiawhte an tel.