News

New Delhi-a cham mek Health Minister Lalrinpuii chuan vawiin (3.8.2026) hian Food Safety and Standards Authority of India (FSSAI) Chief Executive Officer – Rajit Punhani chu FDA Building, New Delhi-ah kawmin, Mizoram in Food Testing Laboratory changtlung zawk a mamawh dan a sawipui.

Mizoram hi a mi cheng zat za zela chhutin India ram pumah cancer tamna ber state a nih mek thu sawiin Lalrinpuii chuan, “Ram changkang zawkte anga kan ei leh in tur – thlai leh thei hrang hrangah mihring tana tha lo chemical residue a awm leh awm loh uluk taka test reng kan mamawh,” tiin ei tur siam license pek theihna tur tawk vel laboratory mai ni lo, mipuiten an ei leh in tur zawng zawng, siam sa leh siam lohte thlenga a him tawk leh tawk loh an hriat theihna tura surveillance tha leh chumi support tur laboratory tha kan mamawh thu FSSAI CEO hi a hrilh a ni.

Rajit Punhani chuan Health Minister hi tha taka lo dawngsawngin, food safety chungchang pawimawhzia hriaa Mizoram mamawh a thlen lawmawm a tih thu a hrilh a, laboratory tha zawk neih theihna tura proposal leh tul dangte ngaihtuah tur technical team a rang lama Mizorama tirh a tum thu a lo hrilh nghal bawk a ni.

FSSAI lamin building sakna an tum theih loh avangin sawrkarin laboratory building tur erawh chu an ruahman a ngaih tur thu CEO chuan Health Minister hi a hrilh a, ruahmanna awmsa te pawh a hmunah rawn enchian tir nghal a tum thu leh a rang thei ang bera hmalak nghal an tum thu a sawi.