Health Minister-in Union Minister a kawm

Nimin (October 14, 2025) khan Health and Family Welfare Minister Lalrinpuii leh Union Health Minister JP Nadda chu Delhi-ah an inkawm.

Lalrinpuii chuan Union Health Minister Mizoram dinhmun hrilhin, ‘Ziak leh chhiar thiam tamna ber state leh state ralmuang ber kan ni chungin kan state-in Central Sawrkar zirna in lian – IIT te, IIM te kan neih ve lo,’ tiin India ram state hrang hranga doctor zirna in tha leh damdawi in lian awmna AIIMS tal chu Mizorama din ve ngei turin a ngen a ni.

Central Sawrkar hian kum 2006 atang khan India ram hmun 22 ah AIIMS (All India Institute of Medical Sciences ) thar din turin hma a la tawh a, tunah chuan heng AIIMS 22-te hi an function hlawhtling deuh vek tawh a ni. Chuvangin he AIIMS thar dinna scheme – Pradhan Mantri Swasthya Suraksha Yojana (PMSSY) chu tuaithar a, AIIMS pawh Mizorama din ve ngei turin Lalrinpuii chuan Union Health Minister chu a ngen a ni.

Union Minister JP Nadda chuan Mizoram Health Minister dilna thlen chu tha taka lo dawngsawngin, an lo zirchian tur thu leh AIIMS hawn a nih ngei theihna atan hma a lo lak tur thu a sawi.

JP Nadda chuan Mizoram Governor, General Vijay Kumar Singh-te nen pawh inthiantha tak an nih thu sawiin, a theih dan dana hmasawnna kawnga thawhho a duh thu a sawi a ni.