News

Tukin (14.10.2025) khan Home Minister K.Sapdanga Sairang Railway Station-a rel a lo luh hnua state pawn atanga zin mi lo lutte dawnsawn an nih dan a hmunah kalin a endik a, Adviser to CM TBC Lalvenchhunga, Chief Secretary Khilli Ram Meena, DGP Sharad Agarwal leh mi pawimawh dangte’n an tawiawm.

NF Railways Dy. Chief Engineer Harjimal Meena chuan Sairang Railway Station-a zin mite dawnsawn an nih dan leh changtlung zawka thawmthat a nih theih nana hmachawp la awmte a tarlang.

Home Minister chuan rel hmanga inkalpawhna kawnga hmasawnna a thlen mek rualin zin mite dawl zo tur leh harsatna an neih lohna turin Sairang Railway Station pawh buatsaih zel a pawimawh thu a sawi a, ‘State pawn atanga rel hmanga zin mi lo lut ten Inner Line Permit la chhuak tura rel station-a rei tak intlar ngai thin hi chinfel vat a tul,’ tiin Mizoram mi leh sate leh ILP dil chawp ngai lote tan chhuahna hran buatsaih vat turin NF Railway thuneitute chu a hrilh.

Home Minister-in Sairang Railway Station-a tlawhna hunah hian, tun dinhmuna ILP pekchhuah leh endikna kalpui dante a enpui a, Sairang Railway Station tih changtlun zelna tura ruahmanna la awmte chu NF Railways-a thawktuten sawifiahin, a lem nen an entir a ni.

He huna tarlan danin, rel a lo thlen hian zin mi 250 atanga 300 vel chu Sairang Railway Station-a chhuk an awm thin. Transport Department ruahmannain Sairang leh Aizawl inkar tlan tur, MST Bus pahnih dah a ni tawh a, chuan man hi mi pakhat tan Rs. 80 a ni.

State pawn atanga lo lut, zin miten ILP dil a hun rei tak an hman loh nan online-a dilna siam a nih bakah rel chhungah ILP dilna form semchhuah theih tura ruahmanna siam a ni dawn. Tuna hman mek, Online ILP Guidelines Version 2 chu siamthat mek niin awlsam zawka dilna buaipui zung zung a nih theih nan Version 3 pawh peihfel tep a ni.

Sairang Railway Station-ah hian zin mite kaihruai a, Mizoram hmun nuam leh thlawh tlakte lo kawhhmuh zung zung thei tur Tourist Facilitation Centre ruahman a tul tih a ni.