Hmeichhiate rilru tihnat palh chuan ngaihdam dil

Mizoram Pradesh Youth Congress Committee (MPYCC) chuan thuchhuah siamin, August 4, 2026-a Vanapa Hall kawt-a programme an hmannaah Chief Minister Lalduhoma’n mipui benghriat tura a thusawi dawihzep tak avanga an lungawi lohna an lantir kawngah Mizo hmeichhiate rilru an lo ti na palh a nih chuan thinlung takin ngaihdam an dil tih an tarlang

MPYCC chuan, “Hetihlai hian Mizoram tana pa berin dawih aw a chhuah reng mai hi a pawi kan ti a, kan Mizo piputen mipa tlaktlai lo leh dawihzep, ral leh sa hlauhawm laka nunau leh khawtlang chhan ngam lote chu, ‘pawnfen feng tlak an ni’ an lo ti thin. Kan Mizo piputen mipa dawihzep an zilhna changchawiin, kan ram lal ber Chief Minister, min thlamuantu ber tura kan ngaihin a insawithaih leh dawih aw a chhuah thin hi sim se kan duh takzet. Chumi avang chuan a thlalak pawnfen kan fentir a, hmangaihna thinlung nen kan zilh a ni,” an ti.

Mizo hmeichhiate hmuhsitna avang emaw dahhniamna avanga he thil hi ti an ni lo tih tarlangin MPYCC chuan, “Hmeichhe zahawmna tihbawrhban tumna leh hmeichhe thuam deuhsawh tumna pawh a ni hek lo. Chuvangin, Mizo hmeichhiate rilru natna tur a awm lo,” tiin rilru na palh an lo awm a nih pawhin an ngaihdamna an ngen

MPYCC tarlan danin, Congress Party hian hmasang atang tawhin hmeichhiate dinhmun chawikannaah te, chak zawka hma an sawnna turah te, an dikna leh chanvo humhim a nih theih nan te nasa takin hma a lo la tawh thinin a la mek zel bawk. Hmeichhe hma khua tha zawk a awm theih nan theihtawp a chhuah zel dawn.