IAF kuta airport hlan kan duh lo

MPCC chuan vawiin (14.10.2025) chhun khan Aizawl Press Club-ah press conference neiin, Indian Air Force (IAF) kuta Lengpui Airport hlan an duh ngai dawn loh thu an sawi.

MPCC Chief Spokesperson John Siamkunga chuan Lengpui Airport chu Airport Authority of India (AAI) enkawl tir nise an duh ber tih sawiin, ‘Mizoram airport a nih anga zalen tak leh thlamuang taka mipuiten an hman theiha a awm hi kan duhber a ni. IAF kuta hlan hi kan phal ngai dawn lo a ni. Anni kuta hlan anih chuan an strick dawna, phal loh thil tam tak karah kan leng anga, kan chep hle dawn a ni. Chu chu kan duh lo,’ a ti.
John Siamkunga chuan ni 11.6.2024 khan Chief Minister’s Office(CMO)-ah Indian Air Force (IAF) hotute leh Lengpui Airport chungchang ngaihtuahtu tur, sorkarin a din, Working Committee to look into the Management & Maintenance of Lengpui Airport-te chuan meeting an nei ho tih sawiin, ‘IAF lam chuan Lengpui Airport enkawl chu an duh thu an sawi a, Mizoram aiawhte pawhin an remtihpui a ni,’ tiin, IAF enkawl airport tam takin an enkawlna hnuaia awm an duh tawh loh avanga airport dang, a thar an dinchhoh zel laia IAF kuta Lengpui Airport hlan chu Mizoram mipuite tan chuan a lungchhiat thlak thu a sawi.

MPCC Chief Spokesperson chuan IAF kuta an hlan a nih chuan Mizoram hian nasa takin a tuar dawn tih sawiin, ‘Thlawhna tum hmun leh a control na operational area chauh IAF in an enkawl anga, a bak zawng: terminal building te, car parking te, security personnel hote leh a dangho zawng hi Mizoram Sorkarin a enkawl zui dawn a, sorkar tan sum sen zuina tur a tam hle dawn a ni. An in hlanchhawn tum dan hi Mizoram tan chuan channa nasa tak a ni dawn a, kan tuar hle dawn a ni,’ a ti.
Chief Minister Lalduhoma’n ‘IAF kuta hlan turin Draft Memorundum of Understanding kan nei tawh; a pumin kan pe dawn lo. A runway atanga lehlam zawng, terminal building lo lam, ramhnuai zawng khu an nei anga. Chu chu a man kan chhutchhuak anga, an lei ang, a leiin. Chu ringawt pawh chu kan thlahlel ve a nia, a man chu’ tia a sawi thu sawiin John Siamkunga chuan, ‘Kan in phel dawn tihna a ni a, ava rapthlak em! Airport khu ZPM Sorkar hian a tichhe vek dawn. IAF in zinmite tan tih tak takin an enkawl dawn lo tihna a nih chu. Bumin an awm mek a ni. Sum ringawt it a thil tih hi chu a pawi asin, a daih rei dawn si lo,’ tiin a tuartu tur chu mipuite bawk kan nih dawn thu a sawi.

MPCC Chief Spokesperson sawi danin, ni 29.4.2025 khan Airport Authority of India (AAI) official-te chu Mizoramah an lo kala, Lengpui Airport tih changtlun dan tur an rawn en thlithlai nghal. Tin, Chief Minister leh official-te an hmua. Mah se, thumumal tak an lo sawipui lo tih hriat a ni. Ni 7.7.2025 khan Lalduhoma’n Union Home Minister Amit Shah, a hmu a, Amit Shah chuan, Lengpui Airport AAI kuta hlan chungchang chu Union Cabinet in an ngaihtuah tur thu alo hrilh a ni. Kan tan kawng tha tak a in hawng meka, chuti chunga sorkar a che duh miah lo hi chu hriatthiam a har khawp mai. RTI chhanna atanga an hmuh danin Lengpui Airport, AAI kuta hlan tura hmalakna mumal a la awm lo. AAI enkawlna aia IAF hnuaia awm ZPM Sorkarin a duh zawk tlat hi thil mak sawi hleihtheih loh a ni. Airport sir 1.5 KM a hlaah hian IAF chuan ram zau tak, compensation hmangin an la fel der tawh nia langte hi ava pawi em.