News

Vawiin (20.6.2026) chhun khan Urban Development & Poverty Alleviation (UD&PA) Minister K. Sapdanga chuan Lunglei Circuit House Conference Hall-ah Lungleia thuthar thehdarhtu, Mizoram Journalists’ Association (MJA), Lunglei District member-te kawmin, thingpui a inpui. UD&PA hnuaiah cheng nuai 5,387 man hmasawnna hnathawh mek leh thawh tur a awm thu a sawi.

Minister hi Adviser to Chief Minister (Political) Lalmuanpuia Punte, MLA bakah, UD&PA Secretary K. Lalthawmmawia leh Director Jacob Lalawmpuia te’n an ṭawiawm a, MJA Lunglei District hi an President H. Lalthansanga’n hoin an thawk chhuak a, Lunglei khawpui hmasawnna tur hma lakna leh hmachhawp hrang hrang an sawiho.

K. Sapdanga chuan tun ṭuma Lunglei an tlawh chu tum bik nei leh thu lawmawm kenga kal an nih thu sawiin, “Lunglei Municipal Council (LMC)-in Lunglei mipuite tana hna a thawhna kawngah hun rei tak hna thawk hlei thei loa a awm hnuah UD&PA Secretariat leh Directorate-te nen an harsatna chinfel dan tur uluk taka ngaihtuahin, a ṭul anga an mamawh ngaihtuahsak turin Lungleiah rawn thawk phei kan ni. Lunglei hmasawnna tura hma lak dan turah LMC hotute leh Lungleia MLA-te nen rilru inhmu takin thil kan relhoa, a lawmawm hle,” a ti.

UD&PA Minister chuan Lunglei kgawpui chhunga UD&PA-in a ruahman hmasawnna project lian zual tar langin, “State Priority Project (SPP) hnuaiah cheng nuai 1,750 hu project lian 5 kalpui mek a awm. Cheng nuai 400 senga Sazaikawna LMC Complex dinna turah ram lei tura biak fel tawh a man pe hlei thei loa kum hnih a awm hnuah tunah ram leina tur sum funin kan rawn thawk phei a, vawiinah inhlan a ni ang. Ram man kan pe tlak thei ta hi a lawmawm hle. LMC Complex sa tur hian contractor thlan fel a ni tawh,” tiin hna an ṭan nghal theih dawn thu a sawi.

Minister chuan SPP hnuaiah hian cheng nuai 350 senga lirthei lian leh te din khawmna tur Transport Hub sakna turin Theiriatah mimal ram lei a nih thu leh a man pek tlakna tur tunah an rawn fun phei thu sawiin, contractor thlan fel tawh a nih thu leh a rem veleh an bun ṭan theih dawn thu a sawi. Cheng nuai 200 senga Ramthar AOC Market Shed sakna tur pawh buaipui mek a nih thu sawiin, cheng nuai 300 senga C. Ṭhuamluaia Mual bula lirthei dahna Multi-Level Car Parking sak hna chu contractor-te’n an thawh mawp mawp tawh thu leh a hmun an laih zawh lek lek tawh thu a sawi a, Saikuti Hall chei ṭhatna turin cheng nuai 500 dah a nih thu leh dawhsan (stage), ṭhutna, lighting & sound, a chung leh thil hrang hrang thlak ngai thlak leh siam ṭhat tur a nih thu sawiin, “A rang thei ang berin hna ṭan tum a ni,” a ti.

K Sapdanga chuan Urban Infrastructure Development Fund (UIDF 2025–2026) hnuaiah Lunglei khawpui tan cheng nuai 525 dah a nih thu sawiin, Lunglei Park chei ṭhat nan cheng nuai 200 dah a nih thu leh khaw ṭhat veleh contractor-te’n hna an ṭan nghal tur thu a sawi a, “Khawlaia vantlang inthiarna in (pay and use toilet) set 1 cheng nuai 25 zelin hmun 4-ah cheng nuai 100 senga siam tura ruahman a ni a, bulṭan theih thuai beisei a ni. A enkawl nan inthiar man erawh a awm a ngai dawn. Khawpui chhunga kea kalte veivahna footpath chei ṭhat nan cheng nuai 225 dah a nih thu leh khuain a zir chuan thawh ṭan theih thuai beisei a ni,” a ti.

SASCI Part-XB hnuaiah Lunglei khawpui chhung hmasawnna hna hrang hrang 80 thawhna tur cheng nuai 200 dah a nih thu sawiin UD&PA Minister chuan, “Municipal te enkawl chhunzawm tur a ni. Councillor-te’n an ward ṭheuhva thawh dan tur an siam fel tawh,” tiin hna ṭan theih thuai beisei a nih thu a sawi.

Minister chuan SASCI Part-V aṭangin damdawi in bawlhhlawh, mipui tana hmuh hrehawm leh him lote tihralna tur leh damdawi in chhung hmanrua tihral leh sawngbawlna turin Theriatah Common Bio-Medical Waste Treatment Facility din tum a nih thu sawiin, ram neih fel a nih tawh thu leh a sak nan hian cheng nuai 1,400 ruahman a nih thu a sawi. Chhim district pali dawl zo tura ruahmanna siam a nih thu leh tender tura lehkha pawimawh buatsaih mek a nih thu a sawi.

SASCI Part-XIII hnuaiah kawr lian hlauhawm siam thei leh a muala tawlh ṭhin tihdamna leh venna tur storm drain siam nan cheng vaibelchhe 10 ruahman a nih thu leh Lungleiah cheng nuai 250 dah a nih thu UD&PA aṭanga Lunglei khawpui tihhmasawnna leh chei mawina atana hmin sa hna thawh mai tur tun ṭuma an rawn feh chhuahpui chu a zavaiin cheng nuai 5,387 hu a nih thu sawiin K Sapdanga chuan, “Lunglei khawpui tana UD&PA project zawng zawng chu rulh leh ngai chi a awm vak lo. Project tam zawk chu sum hnar awm tur a ni zawk. Lunglei khawpui enkawlna atana sum tuakna tur project deuh vek a nih avangin a phurawmin a lawmawm tak zet,” tiin UD&PA leh LMC hotute an lawm ang bawkin Lunglei mipuite pawh an hlim ve hle a beisei thu a sawi.