News

MPCC chuan vawiin (14.8.2026) chhun khan an office-ah political session an hmang a, thusawitu MPCC Vice President John Rotluangliana, Ex. Minister chuan kan sorkar kalphungah mipui an beidawng nia sawiin, Chief Minister Lalduhoma chuan senior-te an liam hnua duh duh sawiah a puh.

John Rotluangliana chuan tuna kan CM hi a tawng duh lutuk a, thil tul lo a sawi hnem ta hle tih sawiin, “Vai muhil kaitho zawnga thu sawite a tul lo. A political career hria hi kan tam hle. London-ah Pi Indira-in min tir a ti a, kha tih laia Chief Minister Pu Hawla’n passport nei remchang a ni a, kan tir a ni tiin a sawi. Pu Liansuama ka bia a, ani chuan Pu Duhoma’n MP nihna a bansan kha remna leh muanna a duh vang a ni lo, 1984-ah Congress-ah a rawn lut a, Lunglei lamah candidate turin kan tir a, ani lah Khawbung lamah din a tum a, Lunglei-ah a va tla a ni. Party kan inthlan a hun a, MLA ni lo, kan senior Pu J. Lalsangzuala kha president turin kan ruat a, Pu Lalduhoma’n floor atangin a chuh lui a, Lunglei lam an rawn kal that avangin president-ah a tling ta a ni,” a ti.

MPCC Vice President chuan sawi chhunzawmin, “Kan senior-te an liam a, Pu Duha’n a duh duh a sawi hi a fel lo. Remna leh Muanna kan neih chungchang hi mimal insawi thei tur kan awm lo a, party pawh inpuh tur kan awm lo. Remna a awm theih nan MNF kha mipuiin moral support an pe. Remna leh muanna a awm theih nan kohhran hruaitute pawh nasa takin hna an thawk a, MNF be turin Bangladesh lamah an kal vang vang a ni. Keini Congress pawhin seat kan lo kian a ni. Remna leh Muanna a awm theih nan Pu Lalduhoma hian phek tinah ka tel a ti. Remna leh Muanna a duh avangin IPS hna ka bansan a ti. Pu Hawlan, ‘Kan sawm lo, amah a rawn intat lut a ni,’ a ti thung,” tiin a politics kalkawnga hriatpui thu leh insawi thei tur a awm loh thu a sawi.