Jul 31, 2026
Friday
MPCC chuan vawiin (31.7.2026) chhun khan an office-ah political session an hmang a, thusawitu MPCC Treasurer Dr. Lalmalsawma Nghaka, AMC Corporator-in thu a sawi.
Dr. Lalmalsawma chuan kum 2028 inthlan lo awm turah hian Congress Party-te chu a fawng chelhtu ni turin an thawk chhuak tan tih sawiin, “Party office-ah Congress kan lun ber tawh a, social media-ah pawh Congress kan lawr ta hle.
Congress hian land use policy hming ngai kan zuar leh thin a, keini hian NLUP kan sawi sak sak ngamna chhan chu kan intiamnaah kan din ngheh thin vang a ni. Party dang hi an intiamnaah an ding thei loa, an hlawhchham zia kan hria a, an policy zuar nawn leh ngam an awm lo. Politics-ah chuan a pawimawh ber chu Party-ten kan intiamna kan tih hlawhtlin leh hlawhtlin loh hi a ni,” a ti.
MNF-in MIP leh SEDP an nei tih sawiin MPCC Treasurer chuan, “An intiam angin an ti hlawhtling ngai loa, zuar nawn leh ngam an ni lo. Tunah hian a thar eng nge an rawn neih leh dawn tih mipui in kan thlir mek a ni. Congress kan danglamna chu kan tihhlawhtlin theih kan zuar thin. Party dangte hian mumang ramah min hruai lut thin a, zir chianna kan nei an tih pawh hi an zirchiang tawk lo thin a, policy ropui awm tak an han sawi hluai,” tiin thlasik mumang angin a thamral leh thin thu a sawi.
Dr. Lalmalsawma chuan tuna kan sorkar hrawn mek hi an la rei lo hle tih sawiin, “Mahse, Bana Kaih Policy an neih hi mipuite banah min kai dawn emaw tih laiin mipuite ban phakah an bân an dah duh leh si lo a, mipuiten kan ban phak lo a ni. ZPM-te hi kan sawisel ngawr ngawr a ni lo, thudik kan sawi zawk a ni. Restricted tender sawisel nasa ber kha tunah chuan a uar ber an ni a, Restricted tender chu a hna thiam bik ten, an tulna hmuna hma an lakna tur a ni. Vawiinah chuan quarters sak thlengin an ti fai vek a, lui kawr siam mai mai pawh an restricted vek a ni,” a ti.
