Nov 06, 2025
Thursday
Supreme Court Advocate on Record JC Lalnunsanga tarlan danin, vawiin (6.11.2025) hian Gauhati High Court, Aizawl Bench-a Chief Justice (Gauhati High Court) Ashutosh Kumar leh Justice Michael Zothankhuma-te thutna bench chuan Kawnpui leh Sairang inkar kawngpui dinhmun tha lo tak chungchanga Mizoram Truck Drivers’ Association (MTDA)-in PIL a thehluh chu a ngaihtuah. NHIDL leh M/s J Infratech te chu an kawng siam thlalak affidavit hmanga court a thehluh turin a ti.
Court order ni 24.10.2025 angin NHIDCL chuan an insawifiahna thehlutin Kawnpui leh Khamrang (118 to 130 kms) inkar chu July 2025 khan PWD kut atanga an lak thu an sawi. Bilkhawthlir–Kolasib (70-95 kms), Kawnpui–Khamrang (118-133 kms), leh Buichali–Sairang (147.8-159 Kms) kawng inkarte chu siam that hna lo thawk lailawk turin (short term maintenance work) M/s. J Infratech Ltd chu June ni 4, 2025 khan NHIDCL chuan an ti. Hemi hna lo thawh lailawk tura work order chu July 7, 2025 khan NHIDL hian M/s Infratech hnenah tih chhuah a ni.
NHIDCL leh M/s. J Infratech Ltd.-te chu kawng khuar hnawhkhahte, leimin leh tui luan kawr thenfaite, lung remte leh a dangte siam hna thawk turin an ti a ni. Ruahsur nasat leh motor veivak an tam avangin hna hi thawh chak theih a ni lo tiin court an hriattir. NHIDCL insawifiahna chu court hian thutlingah pawm loin kawng siam ngei a nih tih chian nan kawng siam thlalak chu affidavit hmanga thehlut turin a ti.
M/s. J Infratech Ltd. chu court hmaa inlan tura hriattir ni mah se, an inlan lo. Court chuan a lungawi loh thu sawiin, M/s. J Infratech Ltd chu an hnathawh chin bakah an hnathawh thlalak kimchang nena affidavit hmanga court hriattir turin a ti. Court hmaa an inlan lo nawn leh a nih chuan he kawngpui hi Mizoram tana a pawimawh em avangin court a in lang turin warrant of arrest chhuah thlengin an ngaihtuah ang tih a sawi lang a ni. Thubuai thehluttu chuan tun hnaia kawngpui dinhmun chhe tak avangin nunna chan an awm tawh thu chu court a hriattir a , court chuan thil awmdanah a lungawi loh thu a sawi a ni. He case hi November 25, 2025-a ngaihtuah leh turin a ruat a ni.
