KC TVS-in huang an zauh

KC TVS chuan hma an sawnna tinghet zel turin huang an zauh a, anmahni dawrtuten chet vel a awlsam zawk nan Aizawl chhim lamah service station an hawn belh.

October 2022 atangin KC TVS hian an hmunpui Bawngkawn, Aizawlah showroom hawngin service an kalpui tel nghal. Lirthei hralh kawngah hma an sawn zel a, kum thum an thlin rualin Model Vengah an branch hawng a, service kalpui nghalin showroom pawh neih zui thuai an inbeisei.

An service station pangngaiah chawhrualin ni tin lirthei 30-40 vel an khawih thin a, an hmunhma a zauh tawk loh avangin an duhkhawp lo deuh tawh a, anmahni dawrtute tan harsatna awm telin nghah rei a ngai phah lo thei lo.

Model Vengah mechanic tha dahin chhiatna liantham leh khawih harsa bik ni lo, service pangngai leh a part thlak ngai an ti thei vek a, part hman lar leh tlanglawn a kawl kim thaw khat. A bikin Aizawl chhim lama mipui tan pan manhla leh awlsam zawk a nih an ring a, heta service an tih avang hian warranty an neih a thih phah dawn lo tih an sawi.

Chief Executive Officer Kevin Vanlaltlana chuan, ‘Tihchangtlun zel kan tum a. Model Venga Service Station thar chhungah hian showroom hawngin lirthei hralh chhuanna tur kan buaipui tel nghal a, kan la zo lo deuh,’ a ti.

TVS hi Indian company rin tlak a nih bakah a part a tlawm avangin a hre chiang chuan an duh phah niin a sawi bawk. Chu bakah hmasawn thei turin lirthei chi hrang an ngah a, electric scooter duh tan iQube a awm a, sports leh street bike duh tan Apache RTR chi hrang hrang bakah cruiser lam ngainate tan Ronin an kawl tel bawk a ni.

TVS Motor Company hi India rama two-wheeler hralh hnem pathumna a ni a, a bikin Jupiter 125 chu India rama scooter hralh hnem ber dawttu a ni nghe nghe. Mizoramah pawh two-wheeler hralh tam pathumna ni mekin Ntorq a lar ve thung a, tunhnaiah Jupiter duhtu an pungin taxi atan pawh an intihmuh chho tan niin an hria.

Kevin-a chuan, ‘Mizoramah chuan Ntorq hi kan hralh tam ber a la ni reng a, mahse, Jupiter nen kan hralh chhuah a inzat deuhthaw tawh. India ramah Jupiter an duh hle a, Mizoramah pawh a thatna kan hre telh telh niin a hriat a, taxi atana rawn hauh lawk pawh an awm nual mai,’ a ti.