News

Vawiin (9.10.2026) chhun khan Vanapa Hall-ah kuhva chingtute tan ‘Training cum Seminar on the Scientific Cultivation of Arecanut and Pest Management’ buatsaih a ni a, an hun hmanpuitu Chief Minister Lalduhoma’n a hmanpui.

Chief Minister chuan plantation crops- kuhva, rubber leh coffee plantation-te chuan green house gas zinga ngaihmawhawm tak Carbon Dioxide (CO2) nasa takin a hip khawm (sequester/absorb) tih sawiin, “Khawvel lum zel tur ven kawngah an thawhhlawkin an tangkai hle. Chuvangin, heng plantation crops atangte hian carbon financing hmuh theih dan kawng sawrkarin a dap mek a ni. Carbon Trading Agency /Carbon Aggregator thawhpui turte zawngin inbiakna neih chhoh mek a ni. Beisei anga thil a kal theih chuan kuhva huan, rubber huan leh coffee huan atangtea Carbon Credit an thawhchhuah atangin huan neituten sum thahnem tak an la lut thei dawn,” a ti.

Kuhva chu kum 2019 atanga khan Land Resources, Soil & Water Conservation Department kutah sorkarin a dah tih sawiin Lalduhoma chuan, “Department chhin chhiah danin Mizoram pumah kuhva huan hi hectare 67,380 vel a zau a awm mek a, nikum 2025-2026 chhung khan Mizoram puma kuhva tharchhuah zat hi quintal 5,12,000 vel niin an chhut a ni. India rama kuhva thar tam lamah pangana dinhmun Mizoramin a luah thei hi a lawmawm. Eizawnna atana kuhva huan siam duhte tan sawrkarin kawng a hawng mek,” tiin Bana Kaih Scheme leh CM Special Package hnuaiahte dilna thehluh theih reng a nih thu a sawi.

Training-ah hian Land Resources, Soil & Water Conservation Minister Lalthansanga pawh a tel a, kuhva chingtu kalkhawmte chuan mithiamte’n thupui hrang hrang hmangin an zirtir a ni.