LADC-ah sorkar din turin kan inbuatsaih &#8211; Vanlalzawma

MNF chuan vawiin (20.11.2025) chhun khan an office-ah chhung inkhawm an hmang a, thusawitu MNF Vice President Vanlalzawma chuan Lai Autonomous District Council (LADC) ah sorkar ngelnghet din tura an inbuatsaih thu leh Dampa Bial MLA by-election neih zawh taka campaignaah an party inlungrual lutuk mak a tih zawk thu a sawi.

MNF Vice President chuan LADC inthlan turah party hrang hrangin candidate an han puang sang sang tih sawiin, “Lai mipuite titiah MNF boruak a ṭha ber tih kan hria a ni. Sorkar nghet leh ṭha din turin MNF party chu kan inbuasaih a, beiseina pawh kan nei sang hle a ni. FCAA hi India danpuia Mizote min humhalhtu article 371G neksawrna a ni Hetiang pass a ni ta hi a pawi tak zet. FCAA hi Mizo mipuite min nekcheptu tur a ni,” a ti.

MNF kan sorkar leh a nih chuan mipui nawlpuiin an chhawr tam theih tur development kalpui kawngah ngaihtuahna zau zawk an put a pawimawh thu sawiin, “Miretheite thleng phak hmasawnna tak tak thawk turin kan inbuatsaih a ṭul. MNF hi party dang nen kan inang lo. Nationalism zungzamin MNF chu min phuar reng tur a ni; nationalism kalsan thiang kan ni lo. Hnam tana nunna thap ngam MNF te i in tuaithar ang u,” tiin kalkhawmte a sawm.

Dampa by-election campaign committee chairman Vanlalzawma chuan Dampa Bial inthlan campaign chungchangah MNF an lungrual tak zet tih sawiin, “heti em ema kan inlungrual hi mak ka tiin lawmawm ka ti tak zet. Chhunglam a inrawlh niin ka hria. Pathian leh mipui zarah lungrual taka MNF thawhhona chuan rah ṭha a chhuah hi a lawmawm ka ti tak zet a ni,” a ti.