Lammual ram khawih danglam tur sawiho

Lammual chei \hat turin Dawrpui Veng a nghawng turte nimin (11.8.2026) khan Bialtu MLA B Lalchhanzova, Minister of state hoin a pisaah Urban Development & Poverty Alleviation (UD&PA) Department hotute leh Dawrpui khawtlang hruaitute’n an sawiho.

Sorkar thuchhuah tarlan danin, Assam Rifles-in an chhuahsan hnua Lammual chei that dan tur master plan siamah Dawrpui Local Council, MHIP leh YMA-te hmunhma neih mekna Bazar Bungkawna mi chu Aizawl Square area ni tura ruahman chhunga mi a ni a, khawih danglam a ni dawn. Hei vang hian Bialtu MLA hoin sawiho a ni.

B Lalchhanzova chuan, Aizawl khawpui laili hmélhmang tihdanglam a nih dawn avangin hmalaknate chu Lammual beautification nena kal kawp tur a nih thu a sawi a, “Hmunhmate chei mawiin, khawpui faina leh chei mawina ngaih pawimawh a ni dawn,” a ti.

Dawrpui veng chu Aizawl laili leh langsar laia awm a nih avangin mawi taka chei a nih tur thu sawiin B Lalchhanzova chuan, a enkawl kawngah theihtawp chhuah zui turin Dawrpui khawtlang a chah.
Dawrpui khawtlang hruaitute chuan, an veng huam chhunga hmun \henkhat sorkarin a khawih danglam turah compensatory fund pe mai lo a, an ram neih ang an humhim theih nan leh in thar \ha tak tak sak nan hmalak a nih dawn avangin an lawm thu an sawi.
Chief minister Lalduhoma leh UDPA minister K Sapdanga ten an ruahmanpui a nih avangin an chungah an lawm thu Dawrpui khawtlang hruaitute chuan an sawi bawk.

Inkawmnaah hian Aizawl Square-in a huam chin, Dawrpui venga hmun thenkhat chei thatna tur ruahmanna a lem nen thlirho a ni a, zawhna leh chhanna hun hman a ni. In awm sa thiah turah mimal ram pali leh pawl hminga ram awm pathum a tel.