Larsapin St. Pauls HSS a hmanpui

St. Paul’s Higher Secondary School, Aizawlin vawiin (18.6.2026) hian kum 2026-2027 chhunga zirlai hruaitu tur House Captain thlan thar 20 te lakluhna “Investiture Ceremony 2026” a buatsaih chu Larsap Gen. VK Singh chuan a hmanbui a, house hrang hrang 5 – Louise House, Montfort House, Gabriel House, Francis House leh Abraham House hruaitu thlan tharte badge a bel sak bakah house flag a hlan.

Midangte nena intawiawm tawn tura fuihin Larsap chuan, “Hruaitu dinhmun chu hamthatna dawnah ni loin midang tana pek tamah teh thin a ni. Zirna ngawr ngawrah insawrbing lova mihring puitling chher chhuah kawnga St. Paul’s Higher Secondary School hmalakna fakawm,” tiin zirna chuan eizawnna kawnga hlawhtling tura thalaite a hrual mai piah lamah khua leh tui tha ni tura a chher hriam tel a ngaih thu a sawi.

Larsap chuan hruaitu thlan tharte duhsakna hlanin, anmahni thlanga an chunga rinna nghattute beiseina tihpuiltling turin taimakna, thuhnuairawlhna leh inpekna nena hna thawk turin a fuih a, “Hruaitu dik tak nihna chu midangte hnena thu pekah ni lo, rawngbawl sakah a innghat zawk. Hruaitu tha chuan ngun taka ngaithlain thil nih dan a hre thiam zung zung a, entawntlak taka nungin mite a hneh thin a ni,” a ti.

He hunah hian St. Pauls HSS Principal Brother Kuriyan MS chuan inlawmna thu a sawi a, khualzahawm David H. Lalthangliana, AIG (Hqrs), PHQ chuan house captain thlan tharte a endik.