LBS NewLife Clinic hawng

Sam tla thinte harsatna su kiang turin inrinniah JL Building, Tuikualah LBS NewLife Clinic hawn a ni a, hemi kawnga thiamna bik nei doctor leh nurse-ten khawl changkang hmangin hna an thawk dawn a, hauh lawk eng emaw zat an awm nghal.

Mizoram Health Department Principal Director retired Dr Lalrinliana Sailo chuan ribbon chet chatin a hawng a,
‘Mizoramah hetiang clinic hi a la awm ngai lo a, hair transplant clinic hmasa ber hawn a ni thei hi thil lawmawm em em a ni’ tih a sawi a. Ram mipui rawngbawlna leh a mamawhte tan thil tangkai a nih theih nan duhsakna a hlan nghal bawk.

Mizo zinga orthopedics specilist hmasa ber Dr Rinliana fanu Dr Lalnunpari Sailo chuan LBS NewLife Clinic hi a enkawl dawn a, amah pawhin ṭhut chilhin a uap dawn a ni.

LBS Group monu Dr Pari hi skin specialist (MD – Dermatology, Venereology, Leprosy) niin sam phun (hair transplant) lama thiamna bik nei a ni a, training chhuak hair technician pahnihin puiin thiamna bik nei mi dangte nen an vaiin hnathawk mi pariatin an vil dawn a ni.

LBS Group hotunu T Zosangpuii chuan Mizorama hair transplant clinic awm hmasa ber an hawn theih avangin Pathian hnenah lawmthu a sawi bakah, mite tan malsawmna ni turin an hlan fel tawh tih a sawi.

Sam phun turin Mizorama chengte tan state dang pan a ngai thin a, he harsatna hi sut kian a nih theih nan operation theatre changtlung tak bunin sam phunna mai bakah hriselna kaihhnawih thil dang – physiotherapy, ultrasound, X-ray, endoscopy leh thisen lakna laboratory an bun tel nghal bawk.

Aizawl lailia mi mal damdawi in hriat hlawh tak ni thin Dr Rinliana din NewLife chawi nun thar lehna a nih thu Dr Pari chuan a sawi a. LBS NewLife Clinic hi a dintute chuan thiamna, khawl mamawh leh thil dangah a tha thei ang berin anmahni dawrtute tan hnathawh an tum a n i.

Mizorama sam phunna clinic hmasa ber hi hawn a nih hmain mi 20 chuangin an hau lawk a, Aizawl laili Vanapa Hall bul hnaiah awmin zing dar 9:30 atanga tlai dar 5:30 thleng dawr theih an ni dawn. A duh tan mobile number 9863513858 / 9862172037-ah zawh chian theih a ni.