Lirtheia chetsualna vangin thi

Nizan (23. 11. 2025) zan dar 11:50 vel khan E. Lungdar leh Biate inkar, E. Lungdar aṭanga kms. 1½ velah truck a chesual a, a khalhtuin nunna a chan.

Truck hi Champhai lam aṭanga kal a ni a, kawngthlangah tlan liamin, metre 150 vel a lum. Motor-ah hian driver leh 2nd driver chuangin, motor neitu leh driver ni bawk, Lalrinthanga (33) s/o Zodinthanga, Champhai Zotlang chu chetsualna hmunah a thi. 2nd sriver Rualthanchama s/o Thanglawra Champhai Zotlang chu hliam na tak tuarin E. Lungdar PHC-ah dah luh a ni.

Chhiattawhna thleng hi East Lungdar V/C leh YMA hruaituten an hriat veleh a hmunah kalin, ṭanpui hna an thawk nghal. Accident thlenna lai hi ram a chheng chhiain, chet vel a harsa hle. YMA hruaitute leh ṭhalai rual eng emaw zat phone call hmanga inkai thoin, hliam tuar leh ruang lakchhuah hna hi an thawk a ni.

He chhiat tawhna thleng chungchangah hian an bungraw phurh senghawi leh thildangah ṭanpuina hna thawh ngai a la awm zui zel dawn a, khawtlang hruaitute thu lo ngaichang zel turin East Lungdar mipuite an in ngen.

Lalrinthanga hian a nupui nen fa pathum an nei.