News

Lunglei Municipal Council (LMC) chuan nimin (4.6.2026) khan Health & Family Welfare Minister Lalrinpuii (Lunglei East bialtu MLA) hnenah National Women’s Icon Award a dawn avangin lawmpuina thilpek an hlan.

National Women’s Icon Award dawngtu Health Minister Lalrinpuii chuan LMC hotute’n amah lawmpuina an buatsaih chu lawmawm a tih thu sawiin, award a dawn chu ama mimal thil tih ṭhat vang nia a hriat loh thu leh award petute’n a chanchin aṭanga an ngaih hlut ber chu Universal Health Care System leh mitthi ruang phurhna an tihhlawhtlin chu nia a hriat thu sawiin, “Hetiang ang tihlawhtling thei tura zir chianna leh ruahmanna kalpuitute leh a hlawhtlin tak takna tura Chief Minister leh a thawhpuite inhawnna zar ka zo a ni,” a ti.

Lalrinpuii chuan award hlanna inkhawmah India ram mi pawimawh tak tak leh foreign lama an thawhpui eng emaw zat an tel thu sawiin, “Mizoram chu India ram hmarchhak kila awm, mihring tlemna kan nih avanga Corporate Social Responsibility sumte pawhin a thlen phak loh thu a sawi leh hma lakpui tura kal khawmte ka sawmna chu an ngaihvenin, award semna inkhawma thu sawitu dangte pawhin an sawi lang zui nghal. Chumi kal zelah chuan Civil Hospital, Lungleia CT Scan khawl thar tur bakah, MRI khawlte nei thei tura beisei a ni,” tiin he’ng hi mipuite’n ṭangkai taka an hman a beisei thu a sawi.