Lo inpuahchah lawk a tul &#8211; Governor

Nimin (15.8.2026) khan Independence Day lawmna Lammuala hman zawhah Governor Gen. VK Singh chuan Lok Bhavan Circular Lawn-ah sawm bikte tan ‘Governor’s At Home’ a buatsaih a, hmasawnna lo thleng tur atan lo inpuahchah lawk a \ul thu sawiin, “Khawhawi tih zauh a tul a, hawiher zim lutuk nuai bo a tul,” a ti.

Governor chuan Mizorama hmasawnna ruhrel lian tak tak zing a mi Bairabi-Sairang railway line hawn tak, Zorinpui thlenga kal tir tum leh Kaladan Multi-Modal Transit Transport Project-te chuan danglamna nasa tak a thlen dawn thu sawiin, “Hmasawnna lo thleng tur atana kan lo inpuahchah lawk a tul. Kan ram mawi leh hnam ziarang hausa takte, rimawi, ei leh in bakah mikhual chunga thatnate hi khualzin tam zawk hip luh nana pawimawh em em a ni. Hetihrual hian, hmunhma leh hmanraw tha, faina ngaih pawimawh leh khual hip thei tur zawnga hmalakte chu thil tul tak a ni. Mikhual lo dawnsawn leh hruai dan training bakah, an thlenna tur homestay leh khawtual siam ngei thil tha tak tak chhawpchhuah kawngah tan lak a tul,” a ti.

Agriculture lam emaw, ei leh in sawngbawl, handicraft, handloom leh a dang hmanga tualchhung thil dehchhuahte hralh kawnga harsatna a awm loh nan market linkage nghet tak din a tul thu sawiin Governor chuan, “Khawhawi tih zauh a tul a, hawiher zim lutuk nuai bo a tul. Mizo thalaite chu thil thiam zung zung thin leh taima in nih avangin ram chhung mai bakah khawvel huapa intihsiaknaa tel tum rawh u. Civil service, IIT, IIM, medical zirna, university, defence service leh a dangahte Mizo thalai tam zawk an luh theih nana hmalak tul. Kan thalaite hian mahni inrinngtawk tak chunga hmun dang an pan a ngai,” tiin midangte nena an va inelna hmanga hlawhtlinna leh tawnhriat an neihte Mizoram tan an rawn hawn a tul thu a sawi.

He hunah hian Eklavya Model Residential School, Tlangnuam, Nuehof English Medium School, Aizawl bakah Local Artist ten Independence Day pualin cultural programme ngaihhlut hlawh tak tak an chhawp chhuak a ni. Chief Minister Lalduhoma, CM hlui pahnih Lal Thanhawla leh Zoramthanga, Assembly Speaker Lalbiakzama, MLA, official leh sawm bik eng emaw zat an tel.