‘Lo la, lei rawh’ hun hmang dawn

Vawiin (22.6.2026) chawhnu dar 2:00 khan Tourism Minister Lalnghinglova Hmar hoin a office-ah sawrkar mi pawimawh leh khawtlang aiawhte’n Khawzawl District-a ‘Pluck & Pay Festival (Lo la, lei rawh) hman dan tur an rel a, September 23 – 25, 2026 chhungin Chawngtlai leh Tualte-ah hman nise an ti.

Tourism Minister chuan Pluck & Pay kalhmang chuan Mizoramah chuan thil thar tak a la nih thu sawiin, “Mizoram tourism-ah bung thar kan kai thei dawn a, a phurawm takzet a ni. Mizoram Sawrkarin mipui leh khawtlang nena tangruala tourism hmasawnna kalpui ‘community-based tourism’ a uar. Pluck & Pay Festival-ah pawh hian department in sumdawn a tum lo a, a thlengtu khuate’n hlawkpui se sawrkar chuan a duh ber,” a ti.

Meeting chuan ‘Lo la, lei rawh’ tih kutpui chu thlai hrang hrang puitlin hun September thla chawhnu lamah nithum chhung hman nise tiin a rel. A hawnna hi Tualte ah neih tur niin, Chawngtlai-ah a kharna hun hman a ni ang.

Pluck & Pay Festival-ah hian a thlengtu khuaa lo leh huanahte kalin, thlai leh theite chu mahni a loin a lei theih dawn. Thlai leh thei lawh mai bakah mikhualte tana tih tur hrang hrang – pipu uai, sairawkherh inperhsiak, kalchhet kal etc. te chu a hmunah buatsaih nise tih a ni. Khaw pahnihah hian thlai leh thei bakah thildang chi hrang hrang zawrhchhuahna tur stall siam a ni bawk ang. Tin, a hawnni leh tawp zanah concert buatsaih nise tih a ni.

Meeting chuan state chhung leh pawn thleng pha turin publicity kalpui hma nise an ti. Tunhnaia tourism event hrang hrang thlirin chhimtu thahnem tak awm tura beisei a nih thu ngaihthlak a ni. Programme kimchang chu Khawzawl DC hoin Organising Committee in an lo rel chhunzawm dawn a ni.

Vawiina meeting-ah hian Tourism leh Horticulture Department hotu te, Deputy Commissioner, Khawzawl District aiawhte bakah Chawngtlai leh Tualte Village Council President te, event management agency aiawhte an tel a ni.