Lunglei MLA-te State University sawipui

Mizoram State University Demand Committee, Lunglei hruaitute chuan nimin (15.11.2025) khan Lungleiah Mizoram State University din a nih theih dan tur chungchang Lungleia ZPM MLA palite chu Lunglei East Bialtu MLA Lalrinpuii site office-ah an kawm.

Mizoram State University Demand Committee hruaitute chuan an zirchiannaah state university chu Lungleiah a din theih ngei tih an hriat thu sawii,n a harsatna lai ringawt thlir lo in, hun lo kal zel turah zirlaite hmakhua ngaihtuah chung leh Mizoramah hmasawnna rualkhai a awm theih nan state university chu Mizoram Chhim lam tan Lungleiah din tul an tih thu an sawi.

District dang nen khaikhinin Lunglei District chuan hmasawnna tur a nei tlem hle nia an hriat thu sawiin State University Demand Committee hruaitute chuan, ‘Zirna hi Lunglei District hmasawnna tura thil pawimawh ber a ni. Lungleia state university a awm theih nana kan hmalakna chu politics a tute emaw fuihpawrh avanga hmala kan ni lo. Chhim lamah zirna sang zawk, post graduate zirna a awm theih nan hun rei taka atanga hmalakna a lo awm tawh,’ tiin Lunglei MLA palite chu theihtawp chhuaha an hmalakna thlawp turin an sawm a ni.

Lunglei MLA-te chuan State University chu Lungleiah a din theih ngei tih an pawm thu an sawi a, Lungleiah a awm ngei theih nan an tan nat thu leh South Tuipui Bialtu MLA Jeje Lalpekhlua bakah Lawngtlai East Bialtu MLA Pu Lorrain Lalpekliana Chinzah te pawhin an thlawp thu sawiin, ‘Higher and Technical Education Minister leh Chief Minister pawh kan sawipui tawh. Langsar tak leh mipui khel chunga hma la kher loin, kan la nawr reng a, a tawp thlenga kan tum,’ an ti.

Hotu nei an nih avangin hotu nei an nih avangin thil an nawrna kawngah an rilru an tihkir a hlauhawm thu sawiin Lunglei MLA-te chuan, ‘Kan duh dan lo a thil kal sual thei a ni,’ tiin state university chu Chief Minister leh Higher and Tehnical Education Minister te an lo sawi pui leh dawn thu State University Demand Committee hruaitute an hrilh a ni.

Mizoram State University Demand Committee, Lungleiah hian zirlai pawl pahnih MZP leh MSU bakah Chhimbial Chhantu, MJA Lunglei leh Lunglei Thalai Pawl aiawhte an tel.