MHIP Building sak thar tur lungphum CM-in a phum

Vawiin (17.8.2026) chawhma khan Chief Minister Lalduhoma chuan Mizo Hmeichhe Insuihkhawm Pawl (MHIP) General Headquarters Building, Treasury Square-a sak thar tur lungphum a phum.

Lungphum inkhawmah hian Chief Minister chuan thu sawiin, MHIP-ten building thar, mawi leh changkang tak an nei mai tur chu a lawmpui thu a sawi a, “MHIP hi kan rama tlawmngai pawl lian zinga hmeichhia leh naupangte tan bika ding awmchhun in nih bakah, sawrkar bultuma din in nih bawk avangin a theih ang anga tuamhlawm zui zel che u pawh hi thil tihawm tak a ni. The Mizo Marriage, Divorce and Inheritance of Property Act, 2014 pass a nih theih nan MHIP hian a thawh hlawk hle. Hna in thawh that avangin kum 2016 khan Ministry of Women & Child Development, Government of India, atangin Nari Shakti Puruskar lawmman in dawng bawk. In hmalakna hrang hrangte hian nunau a thlamuan hle a ni,” a ti.

MHIP leh kan tlawmngai pawl hrang hrangte chu kan society thui phuitu, thangtharte kaihruaitu, kan social institution pawimawhte an nih avangin sawrkar pawhin hmunhma tha leh zahawm tawk tak an neih hi tha an tih thu sawiin Lalduhoma chuan, “Hun lo la awm zel tur ngaihtuahin nangmahni leh in hmunhma enkawlna tur pawh hi thawkchhuak thei ula, ngelnghet takin ding thei ula ka duh em em a ni,” tiin tlawmngai pawl dangte tan pawh hma an lak zel thu a sawi.

MHIP President Lalliani chuan an building hlui chu luah reng tlak a nih tak loh avangin a thar sakna tur an buaipui tih sawiin, kawng tinrenga anmahni lo puitu Chief Minister Lalduhoma leh Women and Child Development Minister Lalrinpuii te bakah sawrkar official-te chungah lawmthu a sawi a ni.

MHIP General Headquarters Building hlui hi April ni 20, 1993 atangin luah tan a ni. Building thar hi a hmun ngaiah, SASCI 2025-26 sum cheng nuaih zathum leh sawmsarih (3.70 crore) senga sak tura ruahman a ni.