News

Nizan (12.5.2025) khan PWD Minister Vanlalhlana chuan Aizawl khawpui kawng siamthat hna thawh mek chu chu a hmunah enfiahin, hna thawktu Nidhi Creative Infrastructure Pvt. Ltd. (NCIPL) Silchar, Assam hnathawh mek chu lungawithlalah a ngai.

PWD Minister chuan, “Krismas hmain Aizawl khawpui kawng hi a tam thei ang ber zawh fel tum a ni a, a bak Mizoram kawngpui pawimawh chin pawh kum 2026 fur ruahtui tlak hma ngeiin thawh vek tum a ni. Mizoramin ruahtui kan dawng tha a, hna thawh hun a tlem avangin thal hun chhungin a tam thei ang ber kawngpui kan siam tha dawn,” a ti.

Aizawl khawpui kawng siamthat hna thawh mek hi kan vei tlang tih sawiin Vanlalhlana chuan, “Tuna kawng mam tha viaua lang pawh hi fur khat daih tur a awm mang lo mai thei. Chuvangin, a chhiat hmain kan phah chhuak leh vek dawn. Kawngpui lûn zual lai hmalakna hmasaah kan hmang phawt dawn a, veng kar kawngte kan chhunzawm zel ang a, mipuite lo dawh hram hram turin kan inngen. Tuna hna thawk mektu Nidhi Creative Infrastructure Pvt. Ltd. te hian motor tlan tlem hun, zan dar 10 atanga a tuk zing thleng hna an thawk thin a, MPWD-ten uluk takin an vil reng a ni. Kawng chhuat chhah zawng leh quality-te uluk taka enfiah reng a ni,” tiin an enfiah chinah a chhah zawng 30mm tura ruahmanah 43mm te ni hlawmin, a lungawi thlak rih thu a sawi.

April 15, 2025 khan Ramhlun North, Aizawlah PWD Minister hian kms. 84-a thui Aizawl khawpui chhung kawngpui siamthat hna bul tanna tur a lo hawng tawh a ni. Fur ruahtui tlak avanga chhunzawm theih a nih loh hnuah, October 30, 2025 khan chhunzawm leh a ni.