Minister-in Som ṭiak a vailiam

Sericulture Minister Lalthansanga chuan tukin (1.6.2026) khan Directorate of Sericulture, Chaltlang aṭangin Keifang leh Mualphenga banakaih scheme hnuaia kuthnathawktu (progress partner) chhungkaw 60 tan muga project hnuaiah Som ṭiak 16,000 a vailiam (flagged-off).

Serculture Minister chuan thu sawiin, “Sericulture Department leh Mizoram Khadi & Village Industry (MKVI) ṭangkawpte thawhhona ṭha tak neia muga project kalpui a ni hi a fakawm. Cheng vaibelchhe 4.9 project ni mah se, pawisa a lo la lut zung zung lo. Heti chunga department leh MKVI ten sum lo thawha lo vahna te a hmunah a khur laih te endika pawisa an lo pe chho zél hi he hmalakna hian loneitu rethei zawkte a thleng phak tih a tarlang,” a ti.

Muga silk siamna tur Muga pangngang project bulṭanna atan hian Saitual District-a Keifang leh Mualpheng kuthnathawktu chhungkaw 60 te thlan an ni. Anni hian tukina vailiam tak Muga pangngang chaw tur Som ṭiak hi a khur an laihah phunin an enkawl lian phawt dawn.

Muga pangngai ei tur Som ṭiak hi kum 3 vel chhungin a puitling thei a, a puitlin rualin Muga silk pangngangte a kungah an dah ang. Muga pangngang cocoon hi a to hle a, kg 1 ₹ 30,000 – 40,000 te a ni phak a ni. Thla 1 tling loah a cocoon hi a thar thei niin an tarlang.