News

Tukin (8.8.2026) khan Health Lalrinpuii leh Commerce & Industries Minister F. Rodingliana chuan Mission Veng Market Building an tlawh a, Food Testing Laboratory puitling dinna atan a hmun hma a tha tawk em tih enho a ni. Minister-te department staff eng emaw zat bakah Mission Veng Local Council leh party hruaitu thahnem takten an lo tawiawm a ni.

Tarlan a nih danin, Mizoramin Food Testing Laboratory kan neih, Central Medical Store Building, Zemabawk, a mi hi Congress Ministry hun lai daih tawha mi a ni a, a lian loa, NABL Accreditation a tling pha lo. Mizoramin kan mamawh ang tawk min la phuhruk phak loh avangin Assam Laboratory lama kan thawn a ngaih chang a tam thin hle. Kan harsatna sukiang tur hian Health Minister Lalrinpuii chuan Central Sawrkara Food Safety and Standards Authority of India (FSSAI) dawrin, State Food Testing Laboratory puitling (Full fledge NADL Accredited Level) dinna tur a zuk sawi chhuak a ni. A dinna tur sum leh pai zawng zawng, bungrua leh khawl bun te, staff thlengin anni hian an rawn tum thei dawn. A dinna tur hmun hma erawh Mizoram Sawrkarin a ngaihtuah ve ta thung a, chumi atan chuan Mission Veng Market Building chu Health Minister leh Commerce & Industry Minister tangrualin an enfiah hmasa ta a ni.

FSSAI atangin endiktu turte hi karleh Nilaini (12.08.2026) khian Mizoram an rawn thleng dawn a, anni hian tha tawk nia an hriat chuan, he lai hmunah hian, State Food Testing Laboratory changtlung tak din zui a ni dawn a ni. Hetiang laboratory hi din theih a nih chuan, ram pawna a sample thawn chhuah zel ngai tawh lovin, kan ram chhungah ngei, he lai hmunah test thei vek a ni tawh dawn.

He project hi a puitling thei a nih chuan, khawtualin ei leh in kan tharchhuah hrang hrang leh ram pawn atanga lak luhte hi ei in atan a thianghlim tawk em tih awlsam takin enfiah zung zung thei dawn a ni. State pawn atanga sangha lakluh te, khawchhak atanga ei tur kan lakluh te, tualchhungin kan siam chhuah – sarep, pickle, cake, mineral water, etc, te a him tawk em tih pawh awlsam takin test theih a ni tawh ang.

Bekang ei sual avanga thihna hial tawkte kan awm thin, khawlai bazara bekang zawrh lai thleng hian test theih a ni tawh dawn. Antam, zikhlum, parbawr, etc ang chi chemical hmanga chawmte, ei in atan a him tawk em tihte pawh test vek theih a ni tawh ang.

Hei hian mipui hriselna kawngah nasa takin hmasawnna a thlen ngei beisei a ni. Cancer tamna state tia hriat hlawh Mizoram mipuite hian kan ei leh in atanga natna chi hrang hrang kan tawrh phah thin te kan hrechiangin kan fimkhur thei zual tawh ngei dawn a ni.