News

Mizoram Sawrkar chuan Mizoram Tipper Association (Diver’s & Owner’s), District Headquarters, Kolasib District-te chu ni 23.10.2025 zing dar 7:00 atanga ni 26.10.2025 tlai dar 4:00 thleng Vairengte to Sairang leh Bairabi to Sairang bakah Kawnpui to Durtlang kawng dan an tum chu thulh turin an ngen.

MTA-in kawng dan an tum chungchang hi vawiin (22.10.2025) hian Home Minister kaihhruaina-in PWD & Transport Minister, Food Civil Supply & Consumer Affairs Minister leh Home Department, Transport Department, MPWD, FCS&CA leh Mizoram Police official-te chuan an sawiho. Hetianga Mizoram chak lakna kawngpui pawimawh ber ni li chhung lai danchah an tum hi Mizoram Sawrkar chuan tha a ti lovin kawngpui danchah hi rem a ti lo a ni.

An meeting zawhah thuthar thehdarhtute kawmin, Home Minister K Sapdanga chuan tunah hian Mizoramah fur ruahtui tlak hun a tawp chho-in ruahtui tla pawh a tlem chho tih sawiin, ‘A bik takin Mizoram chaklakna kawng pawimawh Vairengte leh Sairang inkar kawng pawh Mizoram Sawrkar, PWD leh NHIDCL te’n an siam chho reng. Helai kawng hi siam reng a nih avangin kawngsiam a khaihlak lohna turin Kawnpui leh Sairang inkar kaltlang tur lirthei-te chu intlan chhawk tir thin a ni a, chuvangin lirthei tangkhangte pawh a awm thin. Tunhnaiah ruahtui tla a tlem chhoh avangin kawngsiam pawhin hma a sawn zel a, lirthei te pawh tam zawka chhhuah ni in lirthei tangkhang pawh a tlem chho zel,’ a ti.

Home Minister sawi danin, tukin (22.10.2025) dar 8:30 thleng khan lirthei tangkhang a awm lo. Aizawl lam panin lirthei load phur 367 chhuah ni in Kolasib lam pan tur lirthei 618 chhuah a ni bawk a, darkar 24 kalta chhungin avaiin lirthei 985 helai kawngah hian an tlan tlang a ni. Kolasib District Bawrhsap hova helai kawng siam chungchanga inkawmhona neiha tarlan a nih danin kumin November 1 atang chuan helai kawng hi theitawp chhuaha siamthat tur a nih thu tarlan a ni.

Hetianga Mizoram Sawrrkar leh NHIDCL te’n Vairengte leh Sairang inkar kawng siamtha tura hma an lak reng lai a kawng siam chungchanga lungawi lohna lantira, Mizoram mipuite tana harsatna nasa zawk siam zawnga Mizoram Tipper Association (Driver’s & Owner’s), District Headquarters, Kolasib District ten helai kawng dang tura lungawi lohna lantir an tum hi Mizoram Sawrkar chuan kaltlangpui lo se a duh. Tin, National Highway 306/06 hi Mizoram chak lakna pawimawh leh mipuite in kalpawhna kawng pawimawh a nih bakah kan mamawh engkim kan phurh luhna kawng a nih avangin helai kawng dan hian Mizoram mipuite tan harsatna nasa tak a thlen dawn avangin Mizoram Tipper Associatio
(Diver’s & Owner’s), District Headquarters, Kolasib District te’n helai kawng dan tum hi Mizoram Sawrkar chuan a ngai thutak hle a. National Highway danchah (block) hi National Highways Act 1956, section 88 hnusinh thubuai slam theih an niin na taka hrem theih a ni.

Hemi bakah kawngpui dan hi dan bawhchhiatna a nih angin India Ram dan thar Bharatiya Nyaya Sanhita (BNS) 2023, section 126 teh section 285 angin na taka hrem theih a ni bawk. Tin, kawngpul dang chata mipui mamawh Essential Commodities’ phurh kualna tihbahlah hi Mizoram Essential Services Maintenance Act, 1990 bawhchhiatna a nih avangin na taka hrem theih a ni bawk. Mizoram Tipper Association (Driver’s & Owner’s), District Headquarters, Kolaaib District ten mipui harsatna siam zawnga lungawilohna lantir an tum chungchangah hian an lirthei-te hi Transport Vehicles an nih angin dan fel tak hnuajah permit pek an ni a. Sorkar duh loh zawnga hma an la zel a nih chuan The Motor Vehicles Act, 1988 hnualah permit cancel thlengin an chungah hmalak theih a ni.