News

Nimin (22.10.2025) khan MNF chuan a din cham vawi 64-na pualin inkhawm an buatsaih a, thusawitu MNF President Zoramthanga, ex. CM chuan, ‘Israel faten nasa takin tihduhdah an tuar a, hmun hrang hrangah an darh. Mah se, an ral lo. Pathianin Abrahama hnena thu a thlun an vawng reng a, he thuthlung hi an theihnghilh a hlau em em a ni. Chutiang bawkin MNF ten kan thuthlung, ‘Pathian leh kan ram tan ‘ tih kan vawn chhung chuan thang leh thar lo la awm zel turte pawhin he hnam hi an champion pui zel ang,’ a ti.

Sipai hnena vawikhat pek tawh chu laklet leh a harsa em em thin tih sawiin Zoramthanga chuan, ‘Kan airport neihchhun hi ZPM chuan cabinet ah an lo pass daih tawh. Party dang zawng zawng, NGO, zirlai pawlte leh anmahni party ngei pawhin an duh loh a ni. MNF chuan, a biling a balangin, a tawp thlengin kan theihtawpin kan dodal zel dawn,’ tiin FCAA pawh MNF chuan fai hliauvin an them dawn thu a sawi.

MNF President chuan MNF chu mifing leh ropui ni bik loten an din a nih thu sawiin, ‘Mithiamber leh mifingber kan ni bik hauh lo. Amaherawhchu, party lian leh ropui tak tak an ral tawh laiin, MNF chu kum 64 lai kan kal tawh. Jehova thuthlung meichher kan vawn tlat avangin kan kal zel dawn. MNF tana hnawk party dang chu Pathianin min thenfaisak zel thin. Pathianin min diptu hnim hlingneite min thensak dawnin, kan theihna leh chakna emaw kan tih mai lohnan, MNF hi a tilianin a ti ropui kher ngailova, a hun takah a dinchhuahtir leh mai thin. Heng hi hun kaltaah khan chiang takin a lang a ni,’ a ti.