MNF-in an ze ngai reng an la pu

ZPM Dampa Bial By-Election Committee chuan press statement ti chhuakin, ‘Mizoram mipuiin MNF chu kum 2023 inthlanpuiah a lo hnawl tawh a, mipuiin an hnawl tawh hruaitute tho khan an la hruai a, ze ngai reng an la pu a ni. Mipui tan MNF-ah beisei tur a awm lo,’ an ti.

MNF Treasurer-in Dampa Bial by-election lo awm turah ZPM-in an candidate thlak tumna awm anga a sawi chu a sawi awm tawkah an ngai a tih tarlangin ZPM chuan, ‘MNF tawngvai a la kal tluang zel a ni. ZPM hi MNF Sorkar laia Zokhawsanga Assam Rifle lo sawn chhuak anga in sawia, beng thleng thlenga ke lo khai ang kan ni ve lo. Uluk taka thil kan ngaihtuah hnuah thutlukna kan siam a, kan thutluknaah nghet takin kan ding thin. Dampa Bial by-election lo awm turah pawh ZPM chuan lungsi takin candidate atan Pu Vanlalsailova kan chhawp chhuak a, kan phur tlang hle,’ tiin an Minister leh MLA-ten nasa takin campaign rusum an thlak mek zawk thu an tarlang.

ZPM chuan ‘ZPM Sorkar hi mipuiin kan thlang sual’ tia MNF-in an sawi thin chu a nihna takah chuan party tlum ber ZPM a lo sorkar hi anmahni MNF tan a pawi em vang zawk a nih thu tarlangin, ‘MNF Sorkar laiin Revenue Minister hriatpui loha house pass dilna lak chhuah theih a ni loa, mi rethei leh harsa zawk te’n Revenue Minister thut hunte an chang ngar ngar thin a nih kha. ZPM Sorkar-ah chuan awlsam takin online-in house pass an dil thei tawh a, mipui sorkar dik tak kan hmu tawh a ni. Hei hi entirna pakhat chauh a ni. MNF Sorkar-a 25% tih thawm ri nuai nuai thin pawh ZPM sorkar-ah chuan a reh ta,’ an ti.