MPYCC-in CM pawnfen an fentir

Vawiin, 4.7.2026 (Thawhlehni) hian Congress Thalai (MPYCC) chuan dawihzep avanga mahni thusawi hrang hrang pawh amah bawkin hnial leha ILP leh Mizoram buai avanga remna leh muanna kan neih chungchang sawi nep zawng leh kan inhung bikna thiah pawi ti lo zawnga a sawi duh lohna Vanapa Hall kawtah an lantir a, Chief Minister Lalduhoma chu mi dawihzep leh hruaitu lu ber ni tlak loa an ngaih avangin pawnfen an fentir a ni.

Hemi hunah MPCC General Secretary Rosiamngheta chuan thu sawiin, “ZPM Chief Minister Pu Lalduhoma hian, ‘vai kan hnawt chhuak dawn’ tih nasa taka sawiin, Prime Minister, Home Minister leh Governor-te hnenah vai kan hnawtchhuak dawn tih ka hrilh lawk che u ka ti a, a tha lawm, an ti, tih sawiin ‘kha kha a ni mai lawm’ tiin intithei takin a sawi zui a. Hemi thu hi Home Secretary pawh ka hrilh a, DIB leh National Security Adviser pawh ka hrilh, a ti a ni,” a ti.

Rosiamngheta chuan Lalduhoma bawk hian BJP tlawn lungawi lohna hlauh luat avangin dawihzep takin, ‘central mit timim zawng leh an paih chakawm zawk zawk hian awm lo ila, hektute hi kan ngah, vai danna dan an neihte hi paih a hun tawh tiin kawng zawh ta luai luai mai se, India ram zirlaite tan hian a khirh khawp ang. Chuvang chuan hetia awm hle hle hi a tha ber a, a provoke zawng, a cho zawng, buaina siam zawng rilru hi kan put loh a tha,’ a lo ti tawh bawk. Pu Lal Thanhawla leh a thawhpuiten Chief Minister leh Minister thuthleng Mizoram tana an ken avanga remna leh muanna hi nei thei chauh kan ni,” tiin tlanchhe chunga Mizoram remna leh muanna kan neih hi sawi bawrhban chi a ni loh thu a sawi.

Lalduhoma hian USA a kal tumin, ‘Keimah hian Arakan Army te thleng pawh hian inbiakna neihpui hi ka duh. A chhan chu Arakan Army-te nena kan inhmuh thiam loh chuan keini aiin an chak zawk. Kan ngam tak tak dawn chuang lo, an chak lutuk, sipai an ngah lutuk,” tiin a hlauh thu uar takin a sawi tawh tih sawiin Rosiamngheta chuan, “Tunah ‘kan inhung bikna ILP (Inner Line Permit) pawh hnam dang tana zuamawm thei tur ang berin keini aia tam leh hnam chak zawkte beng thleng turin a sawi chhuak hi Mizoram hi chimrala kan awmna turin min zuar tih a ni’ a ti. Hetiang ram hruaitu dinna nghet nei lo, tum mumal nei lo leh hlauh ngah lutuk hi ram hruaitu lu ber ni tlak a ni loa, pawnfen feng tlak a ni a, a hruaina hnuaiah hian Mizoram leh a chhunga cheng hnam hrang hrang leh kan sakhua hi dinhmun hlauhawm takah min dintir mek. Mizoram him lohna atan hian mawh a phur a ni. A thusawi avang hian Mizoram mipui rilru thuk takin a hliam a, tunkar chhung ngei hian mipui hnenah a thusawi avanga ngaihdam dil turin Congress Thalai chuan a phut a ni,” a ti

He hun hi MPYCC President Ngurdingpuia Pachuau chuan a kaihruai a ni.