MZP-in MPSC Pisa dan an ti tawp

Mizo Zirlai Pawl (MZP) chuan thuchhuah siamin, Mizoram Public Service Commission (MPSC) a buaina tam tak awm avanga siamthat hnatlang ni nga chhung an neih hnuah vawiin khan DP&AR Secretary kaihhruainain meeting neih a nih thu tarlangin, “Mizoram Sorkarin MZP ngenna MPSC Reform Commission/Committee din rawh se tia ngenna angin, DP&AR changtu Chief Minister chuan ‘Committee to Review the Recruitment Framework and Process for Public Recruitment in the Government of Mizoram’ a din ta chu lawmawm kan ti takzet,” an ti.

MPSC siamthat hnatlang a koh chu Committee to Review the Recruitment Framework and Process for Public Recruitment in the Government of Mizoram order tihchhuah a nih tak avangin MPSC Pisa kai dan a hmalak mekna chu a ti tawp tih tarlangin MZP chuan, “He commitee in a tuna buaina hrang hrang kan tarlan hrang hrangte hi fel fai taka chin fel anih theih nan commitee a awm zawng zawngte a ngen a ni. He committee-in MZP a mamawhna apiangah chet chhuah kan in peih reng a, MPSC a harsatna nei zirlaiten a rawn thlen zawng zawngte chu he committee hian fel fai tak leh dik taka a hmuhchhuah ngei a ring tlat a ni,” an ti.

MPSC siamthatna hnatlanga kal zirlaite leh Mizoram mipui thlawpna avangin MZP chuan lawmthu a sawi tak meuh meuh tih an tarlang tel.