Jun 10, 2026
Wednesday
Aizawl District Congress Committee Area Block President Joint Committee chu vawiin (10.6.2026) hian Lal Thanhawla Auditorium-ah an thukhawm a, thusawitu MPCC President Lal Thanzara chuan MNF-te chu ngam loh chala chil hnawmah puhin, sorkar mek chungchangah documents fel tak nen Law Court-a kalpui turin ruahmanna an siam mek thu a sawi.
MPCC President chuan MNF-in an ngam loh chalah chil an hnawm nia sawiin, “Independence an sual a, chumi avang chuan Mizoram pumpui kan buai a tah leh ha thial kan tawng. Chung atanga kan phurrit te chhanchhuak tura Pathianin a thlan chu Congress Party kan ni. Pu Lal Thanhawla leh a thawhpuite avangin kan ramah remna leh muanna a awm. Pu Laldenga hote’n inremna ruahhmanna an pawm avang pawh a ni tel awm e. Heng zawng zawng a thlen theihna chhan chu Central leh Mizoram a Congress sawrkar vang a ni. Pathianin Mizoram min humhim a, kan thenawm ah Burma leh Meitei unaute’n harsatna tam tak an tawk mek. Buaina rapthlak tak kara Mizoramah Pathian hualhimna kan la dawng hi lawmna chang kan hriat a tha awm e,” a ti.
Tawngkam thiam taka politics rawn khel te an lo awm zel tih sawiin Lal Thanzara chuan, “Engmah thawk chhuak lovah min rawn puh. Thangthar tam tak Mizoram buai hre phak lo ten tawngkam thiamte lam umin tun dinhmun ah hian kan ding ta a ni. Kut hnathawkte leh miretheite tan NLUP hmangin malsawmna kan ni. Sawrkar hnathawk thleng pawhin, kan ram a ralmuang. Sawrkar hnathawkte zalen takin Congress hnuaiah an awm a an zalen. MNF sawrkar hnuai ah an awm ngai lo,” a ti a, Congress Block president kalkhawmte chu kohhran leh khawtlanga thiltihna a tel tam tur a fuihin, mahni sahmim tih puarna tura rilru seng lova mipuite rawgbawlna rilru pu a theih tawp a hma la thin turin a ngen a ni.
MPCC President chuan tuna sawrkar mek te’n ram tan eng nge an chhawp chhuah dawn an en dawn tih sawiin, “An sawi lar ber MUCHS mipuiin kan chhawr dan pawh hi kan ngaihtuah chian a ngai. Ramin eng nge kan tawrh thung zawk dawn, he sawrkar liam hnu a sawrkar lo piang leh turin eng ang phurrit nge kan phurh dawn tih kan ngaihtuah a ngai a ni. Corruption laka fihlim a insawi he sawrkar kal dan hi uluk takin kan hotuten an thlir mek a, documents fel tak nen law court a kalpui turin ruahmanna an siam mek a ni,” a ti.
