Ngenna leh hriattirna ti chhuak

Tuikual North Branch YMA chuan tunhnaia social media lama tunhnaia an veng chhunga dawr pakhat chungchang darhah an veng chhung mipuite tana ngenna leh hriattirna an ti chhuak.

An ngenna leh hriattirna (A ngai ngaiin) :

YMA chuan kum 2025-2027 kumpuan atan ‘Ruihhlo Do’ a puang a. Chu chu Tuikual North Branch YMA pawhin chak takin kan bawhzui mêk a, chumi hma lâkna kal zêlah chuan Tuikual North khawtlang a lo ralmuan a, a lo him zawk nan Kumpuan Sub-Committee din niin chak taka hma lâk reng a ni.

Tun hnaiah Social Media-a Tuikual North Branch YMA hma lâkna dem zâwng lek leka thu darh awmte avâng hian pawi kan ti tak zet a ni.

Tun hnaiah kan veng chhung dawr pakhat chungchangah, The Mizoram Liquor (Prohibition) Amendment Act, 2025, etc. danin a phal loh chin zu kawlah te, zan reia thenawm khawvengte tana bengchheng awm thin te leh vantlang kawnga lirthei dah hnawkah te YMA chuan fimkhur turin kan ngen a. Vawi eng emaw zât titipui a nih hnuin Social Media-ah YMA hnawksak ti zawnga tawngkam lo awm palh hi pawi kan ti hle a ni. Chumi hnuah ngaihdam dilna video clip a siam hi puitlinthlâk kan ti a, a chungah Branch YMA chu kan lawm em em a ni.

Tuikual North Branch YMA lakah ngaihdam dil tura ngen a ni lo a, “YMA an hnawk lutuk” tih tawngkam zawk kha thangthar zelten Mizorama tlawmngai pawl lian ber YMA hi an hmuh tleu phah thei dawna a lan avangin YMA thlavâng hauh nan hemi thuah hian YMA lakah ngaihdam dil tura ngen zawk a ni.

India khua leh tui, mi tu pawh hian Fudamental Right kan nei a, inzah tawnsak tur kan ni a, kan dikna chanvo (Right) kan hriat tluk zeta pawimawh chu khua leh tui tha ni tura mawhphurhna (duty) hre tur leh hlen turin kan inngen bawk a ni.

Social Media hmangtu mi thenkhat, thu dik ziktluak lo hmanga thiam taka dawt sawi hmangte avangin kan Society-ah, a bîk takin mimal zalenna rah behsak ang hiala YMA te puhna awm thin hi thil a nihna tak hre lo, chhui zui loh vâng leh eng mah thu bulbâl hre hmasa loa sawi ve mai maiah kan ngai a ni.

YMA chuan ruihhlo do kawngah dan ang takin hma a la chhunzawm zêl ang a, Social Media hman dan chungchangah kan ngaihdan kan sawi hmain thu dik hriat hmasak tum hrâm turin veng mipuite kan inngên a ni.