NITI Aayog Council-ah CM-in thu a sawi

Vawiin (11.6.2026) khan Rashtrapati Bhavan Cultural Centre, New Delhi-ah Prime Minister Narendra Modi kaihhruaiin NITI Aayog Governing Council vawi 11-na neih a ni a, thupui atan hian Human Capital for Viksit Bharat tih chu hman a ni. Chief Minister Lalduhoma pawh telin, thu a sawi.

Chief Minister thusawi tlangpui chu:

1.Mizoram chu India rama fully literate state hmasa ber kan ni a, tun hnaiah Human Development Index-ah kan thang chak hle a, hmarchhak bial District Sustainable Development Index report-ah kan district zawng zawngte chu hmahruaitu (front runner) an ni mek vek a ni. Viksit Bharat 2047 milin Transformed Mizoram 2047 kan kalpui mek. Kum 2047-ah khian Mizoram chuan India ram GDP-ah 1% lo thawhchhuah ve theih kan tum a ni.

2.Full Literacy-ah hian kan duh tawk mai lo va, digital literacy lamah te, financial literacy lamah te, skills & entrepreneur lamah te tan kan la zui zel. Kan thalaite hi tunlai thiamna sang zel mila hnathawk thei turin kan buatsaih. EV Maintenance te, Drone technology te, Artificial Intelligence leh Solar Technology thlengin training kan pe. Sorkar kum kalta chhung khan thalai 26,500 te chu skill training chi hrang hrang kan pe a, an zinga zaa 72 aia tam mahin hna an hmu zui. India Skills Northeast Regional Competition 2025-26 ah Mizoram state chu Champion State a ni.

3.Innovation & Entrepreneurship hi tih makmawh a ni tih kan hriat avangin Chief Minister’s Innovation Challenge kan kalpui a, sorkar Department te, Civil Society Organisation te, College leh Grassroot lam thlengin an tel a. Start-ups leh entrepreneur bultan chho mekte thawhpuina tur Mizoram Handholding Venture Capital Fund kan siam bawk.

4.Digital lama hmasawnna hi kan ngaihpawimawh ber zinga mi a ni. Tunah hian hmarchhak biala telecom network nei tha ber zinga mi kan ni a, kan Tele-density pawh 112 a ni. e-office kan kalpui tawh a, land record kan digitised chho a, mipuite hnenah digital service langtlang takin kan pe chho tan mek.

5.Hmarchhak tana Prime Minister hmathlir ropui tak tihhlawhtlinna kawngah High Level Committee on North East Economic Corridor rawtna kha tihhlawhtlin theih a tha hle. Kha rawtna khan kawngpui, rel kawng, thlawhnaa inkalpawhna, tui lama inkalpawhna, power inthlunzawmna, telecom inthlunzawmna leh bungraw phurh kualna lamah hmarchhak state-te hi mual khata thlirin (one grid approach) ruahmanna a duang a. Kan za atana hlawk tlanna, kan chhawrtlan tur rawtna a ni

(High Level Committee on NEEC Convener hi Chief Minister Pu Lalduhoma a ni a, an rawtna hi June ni 4 khan NEC Plenary-ah Home Minister leh NEC Plenary Chairman Amit Shah hnenah a lo thehlut tawh a ni)

A chunga tarlan bakah hian CM Lalduhoma chuan Act East Policy leh Indo-Myanmar-Thailand Trilateral Highway tihhlawhtlin thuai a tulna te, economic hmasawnna ngaihtuah ruala vantlang nun him leh ralmuang nei tura hmalak a tul thu te, investment chu hmarchhak bial pum thlira state tinte chakna lai hre chunga a hlawm (cluster) a kalpui a that thu te, Mizoram chu tourism lama theihna sang tak nei a nih thu te, Thenzawl Peace City tihhlawhtlin ngei a tul thu te a tarlang a, Mizoram sorkar Handholding Programme chu Viksit Bharat 2047 tihhlawhtlinna programme a nih avangin sorkar laipuiin special support pe thei se a duh thu a thlen.