NSUI-in Minister Dr. Mathlana’n an kawm

National Students’ Union of India (NSUI) Mizoram State chuan vawiin (August 4, 2026) hian Education leh H&TE Department changtu Dr. Vanlalthlana a office-ah an kawm a, Mizoram zirna ti hmasawn tur rawtna hrang hrangt an thlen.

NSUI rawtnate thlente :

1.Mizoram Sorkar hnuaia thawk mek casual teacher 1,475-te hlawh tisang turin kan ngen. High school leh middle school-a thawk casual teacher graduate chin, mi 701-te hian ni khatah Rs. 730/- an hlawh mek a, primary school a thawk casual teacher 675-te hian ni khatah Rs. 570/- an hlawh thung. Mistiri hlawh Rs. 1000/- leh a chunglam leh labour hlawh zat Rs. 600/- pawh an hlawh pha lo hi a tha lo kan ti a, thalaite, a bikin lehkhathiam zawkte rah behna leh hmusitna, zirtirtu hna zahawmna tihbawrhbannaahah NSUI chuan kan ngai. Chuvangin, a rang thei ang bera School Education hnuaia a nghet lo a thawk, casual teacher-te hlawh hi tih pun nise kan duh a ni.

Tin, sorkar sikula zirtirtute chi hrang hrang, hlawh inang lo nuai awm reng mai hi thil fel lo tak a ni. Mission/programme hrang hrang (Samagra, provisional, casual teacher, etc) hnuaia thawk pawh ni se, Mizoramah chuan zirtirtu hlawh hi inang tlanga siam dan kawng zawn nise kan duh hle. Hma min laksak turin Education Minister kan ngen a ni.

2.HSLC & HSSLC result tihchhuah dan tharah result quality, (division hrang hranga pass zat/dan) mipui hriat theih loh tura thup a ni ta tlat hi a pawi kan ti. Hei hian Zirnaah hmasawnna aiin tlakhniamna a thlen ang tih kan hlau hle a ni. Chuvangin, HSLC leh HSSLC result-ah hian mipuiin result quality awlsam taka an hriat theih nan division hrang hranga pass zat mai bakah data pawimawhte chiang taka tarlang leh turin kan ngen. Tin, top 10 tarlan hian sikulte inelna tha lo a siam tih avanga top 10 pawh tarlang duh tawh lo an nih laia Education Minister ber top 10 chinte chawimawinaa khualliana a tang leh si hi hriatthiam a har kan ti.

Zirna siamthatna tur thilah chuan sorkar thawhpui kan inpeih reng. Chutih rualin, zirna leh zirlaite tana tha lo thil reng reng chu dodal kan inpeih reng bawk a ni.