PACS-te hnenah computer set sem a ni

Vawiin (4.8.2026) hian Registrar of Cooperative Societies Conference Hall-ah Centrally Sponsored Project – Computerisation of Primary Agricultural Credit Cooperative Societies (PACS) Phase-III hnuaia PACS computerised tur 50-te hnenah computer set sem a ni a, Cooperation Minister P.C. Vanlalruata’n a hmanpui.

Cooperation Minister chuan thu sawiin, ” Cooperation Department-in theihtawp an chhuah avangin MPACS-te hnenah computer an sem thei hi a lawmawm hle. Sawrkar Laipui leh Mizoram Sawrkarten PACS kan ngai pawimawh hle. PACS hi Mizoram hmel tidanglam theitu an ni,” tiin an thil dawnte tangkai taka hmang turin leh an society tan hmasawnna thlentu ni theuh turin kalkhawmte a chah.

Computerisation of PACS Project hi Ministry of Cooperation hnuaia Centrally Sponsored Project kalpui mek a ni. Phase-III ah hian PACS 50 computerised turin thlan chhuah an ni. Hemi atan hian field verification te neih a ni tawh.

He project-ah hian National Level PACS Software Vendor (NLPSV) atan ‘Intellect Company’ thlan niin, an ni hian India ram pumpuia computerised PACS te hman tur ERP Software-te siamin, chu chu Mizoramah pawh hman a ni.

Hardware sem chhuah hmang hian ERP Software kaltlangin computerised PACS-te hian hna an thawk tawh ang. Hemi hma hian phase-I leh phase-II hnuaiah PACS 49 te chu computerised an lo ni tawh. Hardware semte hi sawrkar thuchhuah zawmin GeM Portal kaltlanga lei a ni a, supplier te hi ‘Synergy Systems’ Dimapur, Nagaland an ni.