PWD MINISTER-IN KAWNG DINHMUN ENFIAH

Vawiin (8.10.2025) Public Works Department Minister Vanlalhlana chuan Mizoram hmar lam tlangdunga khawkar kawng hrang hrangte a tlawhkual a, kumin fur ruahtui tla nasain a tihchhiat Khawruhlian khaw hnuaia NH-02 kawng, thawmthat hna kal mek pawh a hmunah kalin a enfiah nghal.

Khawruhlian khaw bula NH-02 kawngpui hi kumin July thla leh September thla khan metre 50 vela zauin hmun hnihah, lirthei kaltlang theih lohin a tlabal a, PWD-te’n hmalain, tunah hian temporary-in thawmthat hna thawk mek a ni a, lirthei pawh a tlantlang leh thei tawh. Special Repair Estimate cheng vbc. 2.65 chu September 9 khan Ministry of Road Transport & Highways-ah thawnthlak a ni.

PWD Minister hian kumin October 21-23 a Sakawrdaia YMA General Conference neihna tur atana inbuatsaihna ni pahfawmin leh mipuite tan zin veivahna nuam leh him zawk a awm theih nan, Mizoram hmarlam tlangdung kawng hrang hrangte, Sakawrdai thlengin a tlawh. Mauchar, Serkhan leh Bagha inkar kawngte bakah Sihphir leh Durtlang inkar kawngte pawh a tlawh leh bawk dawn a ni.

Minister hi H. Zoramliana, Engineer-in-Chief, PWD; C. Lalthlamuani, Chief Engineer (Planning); Robin Lalrinawma, Chief Engineer (Highways); Lalchhandami, Chief Architect; Eddie C. Zothansanga, Superintending Engineer, NH Circle-I, PWD ten an tawiawm a ni.