Revenue Minister-in land pass a sem

Vawiin (11.11.2025) chawhma dar 11:00 khan Maumual, Aizawlah Distribution of Land Passes at Maumual House Site Plan neih a ni a, Revenue Minister B. Lalchhanzova’n document felfai nei mi 456 te hnenah land pass a sem.

Revenue Minister chuan minister nih hi a inbeisei ngai lo tih sawiin, Minister rau rauah pawh ka chak loh ber chu Revenue Department chan hi a ni ang. Kum 2023 inthlanah ZPM-in sorkarna kan chang a, he department chang tura min ruat pawh khan ka huphurh tak zet a, minister nih hnuah Maumual ram leh hmun dang tam tak ram chinfel ngaiin min hmuak nghal. Tuna Maumual ram chinfel a nih theihna tura tha thawhtute zawng zawng chungah lawmthu ka sawi a ni,’ a ti.

Tuna Revenue Department-in a hmalaknaah ram 3,61,188 zet teh fel tawh a nih thu sawiin B Lalchhanzova chuan, ‘Ram pass lem a awm thei tawh lo turah kan ngai. Sorkar kal tawhten an phak tawk leh tih theih angin hma an lo la tawh a, an chungah kan lawm. Tunah Maumual bik kan chingfel thei ta hi ka lawm a, mi tam takin he ramah hian in an sa chho tawh dawn a, ram buai awm tawh lova, inngeih taka awm tlang turin ram neitute ka ngen duh a ni,’ tiin Maumual 2nd Phase pawh an chingfel leh thuai tura a ngaih thu a sawi.

PAMRA President Vanlalbiaa pawhin thusawiin, ‘Remna avanga lo haw MNF hnam sipaite tana pek Maumualah hian sorkarin LSC-te min pe mah se, mahni ram awmna hre lo kan tam hle. Rambuai a tam bawk nen min chinfel sak turin sorkar vawi tam tak ngen mah ila min tihfel sak thei lo va, sum leh paia harsatna avang tein tam takin an hralh a ngai ta a ni. Tuna kalphung thar mipui sorkar, ZPM- in kum hnih chhung leka min chinfel sak thei hi a ropui kan ti a, Peace Accord MNF Returnee Association member-te min hmangaihtu Chief Minister leh Revenue Minister-te chungah thinlung takin lawmthu kan sawi a ni,’ a ti.

ZPM tarlan danin, Chaltlang ram Maumual-ah hian house pass 829 bawr vel atangin Govt. Land Bank leh land lease engemawzat a awm a, mimal ram 740 bawr vel awmin ram buai a tam em avangin ram nei tan pawh kutthlak hleih theih a ni lo. Revenue Minister B. Lalchhanzova hmalaknain re-survey neih a ni a, department lamin theihtawpa hma an lak zui hnuah chinfel a ni ta a ni. Land Revenue & Settlement Department chuan a hmunah khawl nen thutchilhin LSC awlsam chi leh rintlak zawk tur Record of Rights (RoR) an semchhuak a ni.