Rilru tihnat palh kan neih chuan ngaihdam kan dil

MNF Treasurer Lalruatkima chuan vawiin (8.11.2025) hian Aizawl Press Club-ah press conference neiin, Dampa Bial MLA by-election lo awm tura an candidate Dr R Lalthangliana thlan tlin a ṭulna chhan tarlangin, campaign chhunga mi rilru tihnat palh an neih chuan ngaihdam a dil.

Campaign chhungin ṭhahnem ngaih luat vangin bial chhung mipuite rilru tina zawnga ṭawng leh chetna an nei palh thei tih sawiin Lalruatkima chuan, ‘Chutiang a lo awm a nih chuan an mi hriatthiamna kan ngen tak meuh. MNF campaigner-te duhsak tak leh thahnem ngai taka min lo dawnsawnnaah Dampa Bial mipuite chungah thinlung takin lawmthu kan sawi tak meuh. Kan campaign chhung zawnga min hruai a, min venghim tlattu Pathian chungah lawmthu kan sawi tak meuh meuh bawk a ni,’ a ti.

MNF Treasurer chuan tlin duh luat avangin sawrkar lai, ZPM Party hotute chuan dan dinglaite pawisa hauh loin, an bawhchhe rem rum nia sawiin, “An insawifiahnate pawh ECI lamin an pawmsak lo tih hriat a ni. A pawi tak zet. Hei hian pi leh pute thuvawn ‘Lal ngai lo an lal a na, an lal a kha’ tih kha a tichiang hle a ni,’ tiin MNF campaigner-teah sawisel tur a awm ve lo lawmawm an tih thu a sawi.

Dr. Thangtea thlan tlin a tul chhan a sawite :

Tawnhriat tam tak nei tawh, mithiam a ni. State sum mai ni loin central fund nena ṭawngkawpa development sawichhuak thei tur, development bulldozer a ni tih kan hriat kha.
ZPM Sorkar buai tak, ram kaihhruaina kawnga kal ngaihna hre lo tak hian thurawn petu leh khalh ngiltu ṭha an mamawh hle. Dr Thangtea hi Opposition MLA ṭha tak leh sorkar finchhuahtu ṭha tak a ni dawn a ni.
ZPM sorkar kal dan duhkhawp awm lo tak en hian kum 2028 inthlanah chuan Pathian leh mipui zarah MNF-in sorkarna a chang leh dawn tih a chiang a. MNF arsi lian Dampa mipuiin MLA-a an neih hi a pawimawhin Dampa bial tan kawng hrang hrangin an hlawkpui hle dawn a ni.
ZPM sorkar hian ram leh hnam himna an ngaihsak lo hle. He sorkarah hian nationalism-in kalsan leh ngaihthah a hlawh. Kan hnam a him lo a ni. Nationalism tung ding leh tur hian MNF arsi lian hi House-ah a ṭhut a ṭul tak zet a ni.