RIPANS 25th Graduation and Lamp Lighting Ceremony

Vawiin (7.10.2025) hian Regional Institute of Paramedical & Nursing Sciences (RIPANS) chuan an hmunah 25th Graduation and Lamp Lighting Ceremony, 2025 an hmang a, Goveror Gen. VK Singh in a hmanpui.

Governor chuan hlawhtlinna chang zirlaite thinlung taka a lawmpui thu sawiin, graduation day chu thawhrimna leh inpekna lan chhuahna a nih thu leh mite tana rawngbawlna, lainatna leh mawhphurhna lantir tura bultanna a nih thu a sawi. RIPANS zirtir lut tharte duhsakna hlanin ‘In hmalam huna in thawh turte chu hna satliah ni lo, midang tana malsawmna ni tura rawngbawlna dik tak, lainatna leh ngaihsakna behchhan a ni,’ a ti.

RIPANS hi March 30, 1995 ah din niin, tun dinhmunah department 7 -College of Nursing, Department of Pharmacy, Department of Medical Laboratory Science, Department of Optometry, Department of Radio Imaging Technology bakah kumin atanga bultan Department of Physiotherapy leh PG Diploma in Nutrition and Dietetics – hnuaiah zirna programme hrang hrang 12 (UG 6, PG Diploma 1, PG 4 & Post Doctoral 1) kalpui a ni a. Staff 160 (Teaching 51 & Non Teaching 109) leh zirlai 925 an awm mek a ni.

North Eastern State 8 te bakah India ram hmun dangte tan seat allot a ni a, a vaiin zirna seat 243: B.Sc Nursing 50, B.Sc MLT 40, B.Pharm 40, B.Sc RIT 40, B.Optom 40 leh BPT 33 te a awm mek. Kumin hian under graduate 173 leh post graduate 45, avaiin zirlai degree hlan thar 218 an awm. Chhinchhiah danin RIPANS atang hian vawiin thlengin under graduate 2,815 leh post graduate 166 te an chhuak tawh a ni.