News

All Mizoram Cement & Rod Dealer Association (AMCRDA) hruaitute chuan vawiin (11.6.2026) chhun khan Food Civil Supplies and Consumer Affairs B. Lalchhanzova chu a pisaah an hmu a, Mizoram chhunga rod lakluh size dik lo awm thin chungchang an sawipui.

AMCRDA hruaitute chuan hmun thenkhat atanga Mizoram chhunga rod lakluhte chuan an standard size a pha lo tih an finfiah tih sawiin, “Kan lo enchian tawhnaah 10mm tur 8.5mm te, 20mm tur 18.5mm te, 16mm tur 14mm a siam a tam. Rod size tling lo hman hian insak chu a chak tur leh ngheh tur ang a thlenpui zawh loh avangin mipui tan a him lo thu an thlen,” tiin rod standard size dik chauh lakluh dan ngaihtuahpui turin FCS&CA Minister hi an ngen a ni.

B. Lalchhanzova chuan standard size pha lo rod a awm nia sawi chu pawi a tih thu tarlangin, Mizo mipuite himna a khawih avangin he thu hi a lak thutak thu a sawi a, “Lirnghing natna hmun- Seismic Zone V a awm kan nih avangin kan insak te chu mithiamte ruahman ang leh bungrua pawh chutiang mil ang hman chu a pawimawh,” a ti.

FCS&CA Minister chuan AMCRDA hruaitute thu thlen bawhzui turin kawng hrang hrang a hmalak a tul thu sawiin, “Home Dept., Legal Metrology, PWD, YMA te leh NGO dangte nen pawha thawk hoa hmalak dan ngaihtuah a tul. A rang lama meeting lian zawk koh thuai kan tum ang,” tiin rod dik lote hi finfiahna nen a dik lohna pholan a mipui hmuha tlangzarh a tul thu a sawi.