Silencer/exhaust an tichhia

Lunglei District Superintendent of Police (SP) J. Lalmuankima hmalaknaa Traffic Police-te’n Lunglei khawpui chhunga two wheeler (lirthei ke hnih nei) silencer/exhaust (meikhu chhuahna) 80 decibel pel leh ri ring tura siam danglam an man khawm chu, vawiin (16.6.2026) chhun khan dan ang thlapin Chief Judicial Magistrate, Lunglei District, Lunglei hriatpuinain Lunglei Pukpui Ṭawngṭaina Hmunah tihchhiat a ni.

Tlabung Sub-Divisional Police Officer (SDPO) Alex Hmingthanmawia kaihhruaina hnuaiah silencer man khaem sate hi tihchhiat a ni. Tun thleng hian Lunglei Traffic Police-te’n two wheeler silencer/exhaust ri bengchheng an man khawm hi dan ang thlapin ṭum li tihchhiat a ni tawh.

Lunglei SP J. Lalmuankima chuan ṭhalai ṭhenkhatin an two wheeler-ah danin a phal baka silencer/exhaust ri bengchheng an hman ṭhin avangin zan reiah mipui an timuhil thei lo v, mihring hriselna thlengin a nghawng theih thu a sawi a, “Traffic Police-te’n chak zawkin hma an lak chhunzawm zel dawn,” a ti.

Tun ṭuma two wheeler silencer/exhaust tihchhiatte hi a vaiin kilogram 45-a rit a ni. Kg. 1-ah ₹10 hisapin thirchhia anga hralh niin, a hralhna aṭang hian ₹450 hmuh chhuah a ni. A hralhna sum hi sawrkar revenue-ah chhun luh tur a ni.