News

MPCC hruaitute chuan nimin (12.8.2026) khan Hrangturzo Bial khaw hrang hrang an tlawh a, he hunah hian MPCC Vice President Zodintluanga Ralte, Ex. Minister chuan MNF hotupa leh tuna kan CM ni mek hi BJP a tlaktlum tuma Delhi BJP intlawn siakah puhin, MPSC Office kawta zirlai punkhawm chhan sorkar inthlah dah vang niin a sawi.

MPCC Vice President chuan mi ṭhenkhatten ‘Congress Pary chu central-a an sorkar hunah Mizoramah an sorkar leh chauh ang’ tiin an sawi thin tih sawiin, “Central-a pawl pawh zuk nei lo, PC te, MNF te, ZPM te pawh an sorkar thei a nih chuan central-a sorkar kher lo pawhin Mizoramah kan sorkar thei a ni,” a ti.

Zodintluanga Ralte chuan, MNF hotupa leh tuna kan CM ni mek hi BJP a tlaktlum tumin Delhi BJP an intlawn siak nia sawiin, “Nimahsela, BJP-ten kan Pathian pawi an sawi a, sorkar nghet lo takin a awm chho ṭan mek a ni. Sorkar nghet ṭha tak ni ṭhin kha, Pathianin kut a rawn thawh a, BJP sorkar chu sorkar tlak tawh lo angin tunah hian India mipuite hian an hmu mek. Home Minister Amit Shah chu Parliament-ah vawiin ni thlengin ala kal ngam lo. Kan hotupa Rahul Gandhi erawh ṭhalaiin a kalna lamah an bawh hum hum,” tiin India ṭhalaiten Rahul Gandhi hi chance kan pek angai tawh an tih thu a sawi.

NEET paper leak avangin India ram ṭhalaite an pungkhawm tih sawiin MPCC Vice President chuan, “Tunah hian MPSC hnalak chungchangah thil dik lo tak awmin a tling tawhte, in tling leh lo e, an ti a, a tling lo te, in tling leh si e, an tih avangte, tih sual leh siamṭhat ngai an neih tam lutuk avangin kan Mizo zirlaite MPSC Office tual zawlah an pungkhawm leh mek a ni. Hetiang thil hi Mizoramin kan la tawng ngai lo a, hei hi sorkar inthlahdah vang a ni. Nimin piah lawkah kan CM chuan Human Rights Commission avangin khawtlang then a harsa ang, tih a sawi. Engati nge kan CM hian Human Rights Commission hi hnawk a tih viau? Law & Order a kenkawh zawh loh vang em ni, tih hi ka zawhna a ni,” a ti.