Sorkar leh turin kan inbuatsaih mek &#8211; Zoramthanga

Vawiin (22.6.2026) hian MNF chuan an office-ah chhung inkhawm an hmanga, MNF President Zoramthanga’n thu a sawi.

Zoramthanga chuan, Mizoramin remna a neih chu Pathian pek a nih thu sawiin, “Pathianin remna min pek hi min ninhlei pek a ni lo. Remna chanchin ṭha hril zel tur leh a chanchin ṭha kan hrilh zel theih nan Mizote hi Pathianin remna min pe a ni. Khawvelin remna hlutzia an hre zel a, MNF pawh remna thlen turin kan ṭangkai zia midangin an hre zel a ni,” a ti.

MNF President chuan MNF chungchang sawiin, “MNF hian a hranpain ropuina bik kan nei lo a, kan danglamna bik erawh chu Pathian leh kan ram tan titu kan nihna hi a ni. Chanchin ṭha hril turin he hnam Pathian tana buatsaih hi MNF tum ber a ni reng dawn. Hniam chang nei ṭhin mah ila, Lalpa nghak tlattu leh Pathiana innghat tlat kan nihna hi a lang ṭhin,” tiin MNF chu Lalpan a chawi san leh ṭhin thu a sawi.

MNF Party chu sorkar leh turin a inbuatsaih leh mek tih sawiin Zoramthanga chuan, “Chumi atan chuan a ṭul ang angte buaipui chhoh mek zel a ni. MNF-ah nghet takin, Pathian ring chungin i awm zel ang u,” a ti.

MNF President chuan tunhnaia Delhi a zin report a pe a. Union Home Minister Amit Shah leh mi pawimawh tak tak a hmuh thu sawiin, ṭha takin an inkawm tih a sawi.