Sum enkawl thiam loah sorkar puh

MNF chuan vawiin (19.6.2026) hian an office-ah chhung inkhawm an hmang a, thusawitu MNYF President Robert Romawia Royte, MLA chuan ZPM chuan sum an enkawl thiam loh thu sawiin, ZPM sorkar theih nâna thawh hlawk ber K Sapdanga dah nil dan zawnga sorkar leh party kalphung pela che velah Chief Minister Lalduhoma a puh.

MNYF President chuan Mizoram Sorkarin sum a enkawl dan a thiam loh avangin Mizoram tâna sum sanction sa leh ruahman sa an ti lapse nasa hle tih sawiin, ” MNF Sorkar chhûng khân sum lapse a awm lo thung,” tiin Chief Minister, Finance Minister ni bawk Lalduhoma chu ZPM sorkar theih nâna thawh hlawk ber K.Sapdanga dah nil dan zawnga sorkar leh party kalphung pela che velah a puh a, “CM Pu Duhoma hian a Senior Cabinet Minister dah nil leh tihmualpho tuma a hmanhlelh avangin sorkar kalphung a buai nuai a ni,” a ti.

Ropeway leh Skywalk Lok Ayukta-in a chhui chungchâng sawiin Tourism Minister hlui Robert Romawia chuan, “Tourism Minister ka nih laia ka hriatpuinaa MNF Legal Board-te’n FIR submit an ni. Beisei loh taka accused zinga telh ka nive hi mak ka ti hle,” tiin dere pawh a ei rûk loh avangin he case hian a dikna a rawn phochhuah leh a rin thu a sawi.