Nov 14, 2026
Saturday
August 16, 2026 zana Champhai District Jail atanga tlan chhuak 3 zinga mi Lalthakima (26), Chawngtlai khua chu nimin (13.11.2026) tlai khan man a ni.
Thu dawn danin, Lalthakima hi Myanmar ram chhung Khawmawi-ah in luahin a awm tih hriat a ni a, Myanmar-a Hualngoram Police hriattir an nih hnuah manin, nimin khan Zokhawthar-ah Champhai Police kutah an hlan. Lalthakima hi hmeichhe naupang khuakhem thubuaiah court-in thiam loh a chantir tawh a, kum 20 lung in-a tang tura hrem a ni.
Jail tang tlanchhuak zinga pakhat Lalthlamuana (22), Champhai Jail Veng chu September thla khan Zokhawtharah man a lo ni tawh a ni. Lalthlamuana hi Hmeichhe naupang khuaikhem thubuai pahnih neilai a ni a, a tlanchhuah lai hian a thubuai ngaihtuah lai a ni a, man a nih leh hnuah court-in thiam loh chantirin, kum 20 Lung in tang turin a hrem a ni.
Tang tlan chhuak zinga pakhat Vanlalzara (34) chu man a la ni lo a, a ni pawh hi hmeichhe naupang khuaikhem vanga Dungtlang Police-in an man a ni. Court-in thiam loh a chan tir hnuah kum 20 chhung lung in tang tura hrem a ni.
