Tourism-a Mizoram hmasawnna tur sawiho

Tourism Minister Lalnghinglova Hmar leh amah tawiawmtute chuan vawiin (10.11.2025) chawhnu khan Delhi-ah NITI Aayog Member Dr. VK Paul a kawm a, Mizoram tourism hmasawnna tur chungchang an sawiho.

Lalnghinglova Hmar chuan tunhnaiah Mizoram tlawhtu an pung nasa tih sawiin, ‘Sairang thleng rel a luh hnuah phei chuan Aizawla hotel leh homestay te pawh khualzinin an luah khat thin hle. Mizoramin phochhuah tlak hmun mawi leh nuam tak tak kan nei a, heng hmunte hmanga tourist hiplut tur chuan a khawtual mite’n kan hlut a, kan tlawh hmasak a ngai. Hemi kawngah tunhnaiah nasa takin hma kan sawn a, a lawmawm hle a ni,’ a ti.

Mizoram tourism hmasawnna’na NITI Aayog leh Mizoram Sawrkar hmalakna tur sawiho zingah Mizoram Tourism Conclave buatsaih a tel. Stakeholder tam zawk an tel theihna tur leh, Mizoramin a hlawkpui theih tura ruahmanna siam nise tih a ni. Hemi chungchang bika hmalatu tur ‘Task Force’ din a, a ranglama a hun tihchian theih nise tiin rel a ni. New Delhi-a ‘Mizo Day’ hman chungchang pawh an sawiho.

NITI Aayog leh Mizoram Sawrkar tangkawp buatsaihin November 24 ah Mizoram sawhthing tharchhuah chungchanga inrawnkhawmna, ‘Stakeholder Consultation on Ginger Produce for Mizoram’ tih chu New Delhi-ah neih a ni dawn a, Chief Minister Lalduhoma’n a telpui dawn a, sawrkar official bakah industry, zirna in leh organisation tam thei ang sawm an nih tur thu meeting-ah tarlan a ni. Hemi zulzuia sector dang – a bikin tourism – a programme siam chungchang ngaihtuahho a ni bawk.

Tourism Minister hi Tourism Secretary Vanlaldina Fanai, Delhi Mizoram House Resident Commissioner Alexander V Chongthu leh Tourism Director R Lalrodingite’n an tawimawm.