News

Mizoram Tourism Department chuan PM Ekata Mall chungchangah a hnuai ami ang hian mipui hriat tur thuchhuah an siam.

Tourism Dept thuchhuah :

Tun hnaiah social media-a PM Ekta Mall chungchanga thuthang dik lo tam tak awmin mipuite a ti chiai a, hei hi Tourism Department chuan pawi a tiin, thuchiang zawk mipuite’n an lo hriat nan he thuchhuah hi buatsaih a ni.

PM Ekta Mall, Chawnpui Venga sak mek hi India Prime Minister-in inlungrualna tha zawk India ramin a neih theih nan leh One District One Product (ODOP) chawisan nana project a duan zinga pakhat a ni.

He project hi India ram state dangahte chuan Commerce & Industries Department-in an khawih laiin, sorkar hmasa khan Tourism Department chu hma la turin a lo ruat a ni.

PM Ekta Mall atana sum ruahman hi Department for Promotion of Industry and Internal Trade of India-DPIIT, Government of India atanga sanction a nih theih nan ni 24.08.2023-ah DPR submit a ni a, project cost hi Rs. 127.00 crore niin ni 12.03.2024 khan sanction a ni. Hemi rual hian 50% i.e Rs 63.50 crore dawn nghal a ni.

He project tihlawhtling tur hian harsatna tam tak sut kian chhoh mek a ni a. DPR ringawt pawh vawi thum (3) lai submit a ni nghe nghe a, a chhan chu:-

1.Ni 24.08.2023-a DPR submit-ah hian, a sakna tur hmun atan FCI godown, Zuangtui ruahman a ni a, ni 12.03.2024-a sanction hmuh a nih hnuah FCI godown hi sawn chhuah theih a ni lo tih hriat a ni.

2.DPR pahnihna hi Tourist Home, Zonuam-ah siam a ni a. Tourism Department-in Tourist Home hi C. Lalfakzuala hnenah date 06.02.2017 atanga chhiara kum sawm (10) chhung atana outsource a lo nih vangin, ani hian court-ah department a khing a, chuvangin hmun dang zawn a tul leh ta a ni.

3.Nasa taka sawrkar ram remchang dang zawn a nih hnuah, Printing & Stationery Department ram, Chawnpui atan DPR pathumna (3) siamin submit leh a ni. Hei hi tuna a awmna hmun hi a ni.

A project hi a len tham deuh avangin, tha zawk leh mumal taka kalpui a nih theih nan dan leh hrai leh inkaihhruaina felfai tak nei thlap Central Public Sector Undertaking (CPSU) pahnih rawih an ni. IIFCL Projects Ltd. (CPSU under Ministry of Finance) hi Project Monitoring Unit (PMU), project vil leh endik (Supervision & Monitoring) atan rawih niin, HITES Ltd. (CPSU under Ministry of Health & Family Welfare)-te hi executing agency an ni thung.

Hetianga CPSU pahnih rawih hi project lian tham deuhah chuan an tih fo thin a ni, AIIMS Hospital hmun hrang hrang – Guwahati, Rewari, Gorakhpur, Bhatinda etc. saknaah pawh HITES Ltd. te hi Executing Agency niin RITES Ltd. (CPSU under Ministry of Railways) te’n endik hna (supervision and monitoring) an thawk thung a ni.

HITES Ltd. te hi RIPANS building, Zemabawk satute an ni a, an hnathawh tawhte enin an ni hi rintlak a ngaih an ni. IIFCL Projects Ltd. te hi Ministry of Finance hnuaia PSU an nih avangin leh PM Ekta Mall Project hi Finance Ministry-in DPIIT kaltlanga a monitor reng avangin, an ni hi PMU atan ruat an ni.

IIFCL Projects Ltd.-te enpuina hnuaiah HITES Ltd. hian contractor thlang turin tender an chhuah. An contractor thlan chhuah chuan bank guarantee lem an lo pek avangin tender hi cancel niin, tender an chhuah nawn leh a ni. Tuna contractor SPG Infra Projects Pvt Ltd.-te hi contract award an ni ta a ni. Contract award hi ni 18.07.2025 khan pek an ni.

Heng party hrang hrangte nena thawhhona Memorandum of Agreement (MoA) kan sign hi Law & Judicial Department leh Finance Department ten uluk taka an zirchian hnua vetting an pek vek a ni. He MoA mil hian HITES Ltd. hnenah engagement order chhuah rual in Project Execution Fund atan an contract amount atanga 25% release a ni a. Hmasawnna a awm belh hnuah 20% release leh a ni.

Hei hi project kalphung pangngai a ni. Project lian dangahte pawh Finance Department-in Implementing Department, entirnan PWD, ZIDCO ah sum a hlawmin a pe chhuak a, anni hian an physical progress milin contractor-ah an pe chhuak leh thin a ni. Hetiang chiah hian MTDA hian agreement milin HITES Ltd. ah Rs 45.92 Cr (TDS leh Income Tax paih hnu) hi a pe chhuak a, HITES Ltd te hian Project Execution Fund atana sum kan release hi HITES Ltd. leh IIFCL Projects Ltd contractor-te Bill leh an hnathawh an lo endik vek hnuah contractor-te hnenah an hnathawh mil zelin an release ve leh tur a ni. Mizoram Sorkarin contractor-te hnena bill release ah hian thuneihna a nei tawh lo.

Vawiin thleng hian contractor SPG Infra Projects Ltd. te hnena HITES Ltd. in sum a release tawh zat hi Rs. 1.46 crore a ni. Hei hi sum release tawh Rs. 63.50 crore atanga chhutin 2.30% chauh a la ni a, tuna a taka hnathawh tawh (physical progress) hi 18% a ni thung.

Utilization Certificate hi 1st installment atanga 75% kan hman zawh hnuah theh luh tur a ni a. 2nd installment hi 15th Finance Commission hun ral hmaa hnuh chhuah ngei a tul avangin UC hi zuk pek lailawk a ni a, Financial Year 2026-27 ah budget provision a awm leh dawn tih hriat hnuah UC hi ennawn leh niin, ni 12.02.2026 khan Finance Department-ah submit leh a ni.

A hmaa UC submit tawhte pawh he UC dated 12.02.2026 hian a luahlan (supersede) vek a ni. Ardeco Design Build, HITES Ltd, IIFCL Projects Ltd te hnena sum release leh MTDA Administrative Cost atana sum hman belhkhawm hi Rs. 56.78 crore niin, chu chu 1st installment a 89.40% a ni a. Hemi mil hian UC hi siam a ni.

Contract Award hi EPC mode a pek a ni a. An drawing leh estimate hi IIT Guwahati in vetting an tih hnuah chauh pawm theih a ni. Hetiang anga design siam vek a nih hnuah hian seismic zone-V atanga seismic zone–VI a puan kan lo nih leh tak avangin design leh drawing tih that leh vek niin, IIT Guwahati a vetting lak chhung pawh hi thla thum (3) lai a ni.

Permit tul chi hrang hrang leh NOC-te tihfel a nih hnuah leh Printing & Stationery Department staff quarter-te thiah fel a nih hnu in, ni 23.08.2025 khan Chief Minister zahawm takin sak tanna tur lung a phum ta a ni.

Tarlan tawh angin a hmun chungchangah harsatna tam tak kan paltlang tawh a, tunah hian electric ban sawn leh a hnuai lam atanga bungraw lak luhna tur kawngte pawh chinfel ngai zingah a la awm a ni.

Hna hi chak lehzuala thawh a nih theih nan theihtawpin Department chuan hma a la a, hnathawktute pawh nasa taka nawrin shift hnih (chhun leh zan)-a thawkin theihtawp kan chhuah mek a ni. Hmun awih taka hna hi thawh a nih avangin a foundation stage-ah hian hnathawh a langsar thei lo va, a lei seh chin a pelh hnuah chuan hmasawnna langsar zawka hmuh beisei a ni.

PM Ekta Mall sak chungchangah hian state tinte kan thlen chin a inang lo a, state thenkhatte chu a hmun tur la ti fel lo te an awm laiin, a thente chu zo fel tawhte pawh an awm. Keini Mizoram pawh a hmun vawi thum lai kan thlak avangin state dangte aiin hna kan thawk tan tlai a, harsatna hriat lawk loh hmachhawn tur a awm tawh lo a nih chuan kum 2027 chawhma lamah chuan zawh theih beisei a ni.

He project hi uluk taka duan a nih angin theihtawp leh fimkhur taka hmalak mek zel a ni a, Mizoram mipuite’n lo ngaichang a, lo chiai lo turin Tourism Department chuan a ngen a ni.